Azərbaycan idmanı üçün böyük qələbələr, tarixi nailiyyətlər və əlamətdar hadisələrlə zəngin olan 2012-ci ilin finişində ölkəmizin idman ictimaiyyəti daha bir uğura sevinmişdir. Bakının kişilərdən ibarət şahmat komandası Birləşmiş Ərəb Əmirliklərində yenicə başa çatmış şəhərlər arasında dünya çempionatının gümüş medallarını qazanmışdır.

Eltac Səfərli, Qədir Hüseynov, Rauf Məmmədov, Nicat Məmmədov və Vasif Durarbəylidən ibarət yığmamız finaladək inamla irəliləyərək altı matçda bir dəfə də uduzmamışdı. Qrup mərhələsində İstanbul (Türkiyə), Timoşoara (Rumıniya) komandaları üzərində qələbələr, Astana (Qazaxıstan) ilə matçda heç-heçə, səkkizdəbir finalda Paris (Fransa), dörddəbir finalda Vu Ksyu (Çin) və yarımfinalda Novi-Sad (Serbiya) şahmatçıları ilə görüşlərdə müvəffəqiyyət Azərbaycan paytaxtı təmsilçilərini finala çıxardı.

Həlledici matçda isə qrossmeysterlərimiz Hollandiya yığmasının əsasını təşkil edən Hovenegen şəhərinin komandası ilə qarşılaşmışlar. Səfərli - Aniş Giri, Rauf Məmmədov - İvan Sokolov və Durarbəyli - Jan Smets görüşləri heç-heçə nəticələnmiş və matçın taleyi üçüncü taxtada həll olunmuşdur. Burada Nicat Məmmədov beş saatdan çox davam edən görüşdə Sergey Tivyakova uzun müddət ciddi müqavimət göstərsə də, hər halda, 89-cu gedişdə məğlubiyyətlə barışmalı olmuşdur.

Nəticədə dünya çempionu adını finalda 2,5:1,5 hesabı ilə qalib gələn Hovenegen komandası qazanmışdır. Bakı şahmatçılarına isə gümüş medallar təqdim olunmuşdur. Əlbəttə, 24 komanda arasında ikinci yer də böyük müvəffəqiyyətdir.

Bürünc medallara Novi-Sad komandası sahib olmuşdur.Serblər üçüncü yer uğrunda matçda Daşkəndlə heç-heçə oynamış, lakin əlavə göstəricilərə görə özbəkistanlı rəqiblərini üstələmişlər.

“Xalq qəzeti”