Azərbaycan paytaxtı şahmatçılarının yığma komandası Birləşmiş Ərəb Əmirliklərində keçirilən şəhərlər arasında dünya çempionatının yarımfinal mərhələsində Serbiyanın Novi-Sad şəhərinin komandasını məğlubiyyətə uğradaraq finala çıxmış və həlledici görüşdə qızıl medallar uğrunda mübarizə aparmaq hüququ qazanmışdır.

Qrossmeysterlərimiz serblərlə matçda rəqiblərinə heç bir ümid yeri qoymamışlar. Dörd taxtadan üçündə Azərbaycan şahmatçıları qələbəyə sevinmişlər. Eltac Səfərli İvan İvanişeviçə, Qədir Hüseynov Robert Markusa, Vasif Durarbəyli Nikola Sedlaka qalib gəlmişlər. Rauf Məmmədov isə Miloş Perunoviçlə heç - heçəyə razılaşmışdır.

Nəticədə bakılılar matçdan inamlı qələbə ilə ayrılmışlar - 3,5:0,5. Bununla da komandamız ən azı dünya çempionatının gümüş medallarını özünə təmin etmişdir.

Digər yarımfinal görüşündə Hollandiyanın Hogeven şəhərinin komandası Daşkəndə (Özbəkistan) 3:1 hesabı ilə qalib gəlmiş və finalda Bakıya rəqib olmuşdur. Dünya çempionatının ən mühüm matçı dünən axşam keçirilmişdir. Yığmamız Aniş Giri, İvan Sokolov, Sergey Tivyakov və Yan Smetsə qarşı Səfərli, Rauf Məmmədov, Nicat Məmmədov və Durarbəylidən ibarət heyətlə mübarizə aparmağı qərara almışdı.

 “Xalq qəzeti”