Bakının yığma komandası Birləşmiş Ərəb Əmirliklərində finişə yaxınlaşmaqda olan şəhərlər arasında şahmat üzrə dünya çempionatında növbəti qələbə qazanmışdır. Qrossmeysterlərimiz bu dəfə dörddəbir finalda Çin Xalq Respublikasının Vu Ksyu şəhərinin komandası ilə prinsipal görüşdə rəqiblərini 3:1 hesabı ilə məğlubiyyətə uğradıb yarımfinala çıxmışlar.

Bu matçda Eltac Səfərli birinci taxtada çinlilərin lideri Van Yue ilə heç-heçəyə razılaşmış, Qədir Hüseynov isə ikinci taxtada Ji Dan ilə görüşdən yarım xalla ayrılmışdır. Digər iki taxtada Rauf və Nicat Məmmədovların dəqiq gedişləri müvafiq surətdə Li Venlyanq və Fanq Yuksianqı məğlubiyyətlə barışmağa məcbur etmişdir. Nəticədə bakılılar matçdan inamlı qələbə ilə ayrılmışlar.

Dörddəbir finalın digər görüşləri belə nəticələnmişdir: Hogeven (Hollandiya) - Saratov (Rusiya) - 2:2, əlavə göstəricilərə görə hollandlar qalib gəlmişlər, Daşkənd (Özbəkistan) - Afina (Yunanıstan) - 3:1, Novi-Sad (Serbiya) - Lund (İsveç)- 2,5:1,5.

Beləliklə, Bakı, Hogeven, Daşkənd və Novi - Sad komandaları yarımfinalda mübarizə aparmaq hüququ qazanmışlar. Bu mərhələnin matçları dünən axşam keçirilmişdir. Bakı şahmatçıları finalın astanasında İvan İvanişeviç, Robert Markus, Miloş Perunoviç və Nikola Sedlakdan ibarət Novi - Sad komandası ilə görüşmüşlər.

 “Xalq qəzeti”