Azərbaycan paytaxtının kişilərdən ibarət şahmat komandası Birləşmiş Ərəb Əmirliklərində keçirilən şəhərlər arasında dünya çempionatının qrup mərhələsinin son turunda Rumıniyanın Timişoara şəhərinin komandasına 2,5:1,5 hesabı ilə qalib gələrək səkkizdəbir finala vəsiqə qazanmışdır.

Rumınlarla matçın taleyi dördüncü taxtada həll olunmuşdur. Nicat Məmmədovun Marius Manolaçe ilə görüşdə müvəffəqiyyəti bakılıların qələbəsini təmin etmişdir. Digər üç taxtada Eltac Səfərli - Konstantin Lupulesku, Qədir Hüseynov - Mirca - Emilian Parliqras və Rauf Məmmədov - Vladislav Nevedniçi görüşləri heç - heçə nəticələnmişdir.

Həmin gün “D” qrupunda keçirilmiş digər matçda Astana şahmatçıları İstanbul komandasını məğlubiyyətə uğratmışlar - 3,5:0,5. Nəticədə Qazaxıstan və Azərbaycan təmsilçiləri qrup turnirini hərəyə 5 xalla ilk iki pillədə başa vurmuşlar. Əlavə göstəricilərə görə qrupun qalibi Astana şahmatçıları olmuşlar.

Bakı komandası ikinci yeri tutmuş və səkkizdəbir finalda “E” qrupunun qalibi Paris komandası ilə görüşmək hüququ qazanmışdır. Bu matç dünən axşam keçirilmişdir.

 “Xalq qəzeti”