Taekvondo üzrə Azərbaycan yığma komandası Dünya kuboku uğrunda yarışlara hazırlaşır. Hazırlığı başa vurduqdan sonra komandamız Dünya kubokunun keçiriləcəyi Çin Xalq Respublikasına yola düşəcək.
Qeyd edək ki, iyulun 17-20-də keçiriləcək Dünya kubokunda ölkəmizin idman şərəfini beş idmançı - Samir Aydınov, Vasif Qurbanov (hər ikisi 58 kiloqram), Fariz Əliyev (68 kiloqram), Ramin Əzizov (87 kiloqram) və Təvəkkül Bayramov (87 kiloqramdan yuxarı) qoruyacaq.
Bu arada Afina-2004 və Pekin-2008 Olimpiya oyunlarının iştirakçısı,taekvando üzrə Azərbaycan yığma komandasının üzvü Rəşad Əhmədov mətbuata verdiyi açıqlamada deyib ki, o, Dünya kubokunda iştirak edə bilməyəcək.Buna idmançımızın ötən ay Sankt-Peterburqda keçirilən Avropa çempionatı ərəfəsində aldığı zədənin hələ də sağalmaması səbəb olub. O bildirib ki, 15 gün müalicə olunduqdan sonra hər şey qaydasında olsa da, məşqə çıxan kimi yenidən həmin zədə təzələnib: "Yığmanın heyətində Kanadaya beynəlxalq turnirə yollanmalı idim. Müəyyən vaxt hazırlıq keçmədiyimdən məşqlərə başladım və özümü qorumadım. Elə ilk gündə yenidən zədələndim. Ancaq indi yavaş-yavaş hər şey qaydasına düşür. Dünya kubokuna getməsəm də, artıq qaçışlara başlamışam. İnanıram ki, komanda Bakıya qayıtdıqdan sonra onlara qoşulacağam". R. Əhmədov karyerasını bitirmək barədə düşünmür: "Mənim uğurlarım hələ irəlidədir. Zədəm yenilənsə də, məşqlərimi davam etdirəcəyəm. Karyeramı bitirməyi ağlımdan belə keçirmirəm. Yenidən yarışlara qatılacağam və qələbələrimlə komandamıza öz töhfəmi verəcəyəm".

Mahmud QƏZƏNFƏROĞLU, "Xalq qəzeti"