Azərbaycan şahmatının liderləri Teymur Rəcəbov və Şəhriyar Məmmədyarov bu günlər Çin Xalq Respublikası paytaxtının qonağıdırlar. Qrossmeystrlərimiz Pekində start ərəfəsində olan və Ümumdünya  intellektual oyunları çərçivəsində keçirilən turnirlərin mükaftları uğrunda mübarizə aparcaqlar.

Üç turnirdən (rapid, blits və taxtaya baxmadan) ibarət yarışda təmsilçlərimizin rəqibləri Sergey Karyakin, Aleksandr Qrişuk, Aleksandr Morozeviç (hər üçü Rusiya), Levon Aronyan (Ermənistan), ABŞ təmsilçiləri Hikaru Nakamura və Qata Kamski, ukraynalı Vasili İvançuk, bolqar Veselin Topalov, Peter Leko (Macarıstan), Viorel Boloqan (Moldova), Baadur Cobava (Gürcüstan), Çin şahmatçıları Van Hao, Din Lijen  və hollandiyalı Aniş Giri olacaq.

Bu barədə Rusiyanın e3e5 saytının yaydığı xəbərdə həmçinin bildirilir ki, intellektual oyunların şahmat proqramı rapid turniri ilə başlanacaq. İki gün (14-15 dekabr) davam edib İsveçrə sistemi üzrə keçiriləcək bu yarış yeddi turdan ibarətdir. Dekabrın 16-17-də  iştirakçılar blits turnirində (dairəvi sistem, 15 tur) üz- üzə gələcəklər. Sonrakı iki gündə isə qrossmeysterlər taxtaya baxmadan ən yaxşıları müəyyənləşdirəcəklər. Sonuncu turnir də yeddi turdan ibarət olacaq.

Oqtay BAYRAMOV,
“Xalq qəzeti”