"İdman ili" çərçivəsində Sumqayıt Şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə məhəllə və mikrorayon sakinləri arasında ənənəvi II kross yarışı keçirilmişdir. Yarışda 400-ə yaxın həvəskar idmançı iştirak edirdi.
Tədbirin açılış mərasimində qeyd edildi ki, böyüməkdə olan nəslin fiziki və mənəvi inkişafında idmanın rolu danılmazdır. Azərbaycan Prezidenti cənab İlham Əliyev hər zaman gənclərə qabiliyyətləri və intellektual imkanları müqabilində hərtərəfli şərait yaratmağı prioritet vəzifə kimi qarşıya qoyur, bu təbəqəyə çox böyük diqqət və qayğı göstərir. Bu baxımdan ölkəmizdə bədən tərbiyəsi və idmana böyük diqqət yetirilir. Sevindirici haldır ki, son dövrlərdə cənab Prezidentin iştirakı ilə Sumqayıtda böyük bir idman məktəbi və Olimpiya İdman Kompleksi tikilərək istifadəyə verilmişdir.
Sonra kross yarışına start verildi. İdman tədbirini Sumqayıt Şəhər İcra Hakimiyyətinin başçısı Eldar Əzizov, hüquq-mühafizə orqanlarının rəhbərləri, ictimaiyyətin nümayəndələri maraqla izlədilər.
Yarışın sonunda I-X yerləri tutan idmançılara şəhər Gənclər və İdman Baş İdarəsinin fəxri fərmanları və hədiyyələri təqdim edildi.

Əli NƏCƏFXANLI, "Xalq qəzeti"