"Bakı - Azəryol" dörddəbir finalda
Azərbaycan paytaxtının bu komandası qadın klubları arasında Avropa Voleybol Konfederasiyasının kuboku yarışlarının dörddəbir final mərhələsində mübarizəni davam etdirəcəkdir.
Səkkizdəbir finalın ilk görüşündə səfərdə Almaniyanın "Rote - Raben" komandasına uduzan "Bakı - Azəryol" öz meydançasında cavab matçı ərəfəsində çətin vəziyyətə düşmüşdü. Voleybolçularımız növbəti mərhələyə vəsiqə qazanmaq üçün həmin məğlubiyyətin əvəzini artıqlaması ilə çıxmalı idilər. Komanda bunu bacardı. "Əsas vaxtda" 3:2 hesabı ilə qalib gələn bakılılar "qızıl hissə"də də inamla oynayaraq (15:10) dörddəbir finala çıxmaq vəzifəsini yerinə yetirməklə həm özlərini, həm də pərəstişkarlarını sevindirdilər.

Hüseynov - Petrosyan - 1:0
Birləşmiş Ərəb Əmirliklərinin Əl - Füceyrə şəhərində keçirilən şahmat üzrə beynəlxalq turnirin səkkizinci turunda azərbaycanlı qrossmeyster Qədir Hüseynov erməni Tiqran Petrosyanla görüşmüş və qara fiqurlarla qələbə qazanmışdır. Bu turnirdəki digər təmsilçimiz Eltac Səfərli isə gürcüstanlı Baadur Cobava ilə heç - heçə oynamışdır.
Səkkiz turdan sonra hər iki şahmatçımızın 5 xalı vardır və onlar ukraynalı lider Sergey Fyodorçukdan bir xal geri qalırlar. Dünən keçirilən sonuncu, doqquzuncu turda Hüseynov və Səfərli müvafiq surətdə iranlı və çinli rəqiblərlə görüşmüşlər.

Oqtay BAYRAMOV, "Xalq qəzeti"