Bakının "Rabitə" komandası qadın voleybol klubları arasında Çempionlar Liqası turnirində uğurlu çıxışlarını davam etdirir. Azərbaycan çempionu qrup mərhələsinin üçüncü turunda Polşada yerli "Atom" komandası ilə qarşılaşmış və oyunun taleyini üç hissədə öz xeyrinə həll etmişdir - 3:0.
Bu qələbədən sonra "Rabitə" 9 xalla qrupun vahid lideridir. Xatırladaq ki, Azərbaycan və Polşa klublarının çıxış etdikləri qrupa həmçinin İtaliyanın "Villa Korteze" və Çexiyanın "Agel" komandaları daxildirlər.
Avropa Voleybol Konfederasiyasının kuboku yarışlarında mübarizə aparan "İqtisadçı" da pərəstişkarlarını növbəti qələbə ilə sevindirmişdir. Bakılılar səkkizdəbir final mərhələsinin ilk görüşündə tərkibində Azərbaycan milli komandasının oyunçusu Natalya Məmmədovanın da çıxış etdiyi Rusiyanın "Omiçka" komandasını qəbul etmiş və 3:1 hesabı ilə qalib gələrək noyabrın 21-də Omskda keçirəcəkləri cavab görüşü ərəfəsində dörddəbir finala vəsiqə qazanmaq üçün özlərinə yaxşı zəmin yaratmışlar.
Dünən axşam daha iki klubumuz avrokuboklarda növbəti görüşlərini keçirmişdir. "Azərreyl" Çempionlar Liqası turnirinin qrup mərhələsinin üçüncü turu çərçivəsində Polşanın "Tauron" komandasını qəbul etmiş, "Bakı - Azəryol" isə Avropa Voleybol Konfederasiyası kuboku yarışlarının səkkizdəbir final mərhələsinin ilk görüşündə Almaniyada "Rote Raben"in qonağı olmuşdur.
Onu da qeyd edək ki, klublarımızın qitə miqyaslı yarışlarda çıxışları ilə əlaqədar olaraq Azərbaycan Superliqasında noyabrın 27-dək fasilə verilmişdir. Milli çempionatımızda dörd turdan sonra turnir cədvəlinə 3 oyunda maksimum miqdarda - 9 xal toplayan "Rabitə" başçılıq edir. İkinci yeri tutan "İqtisadçı"nın da bir o qədər xalı vardır, lakin bu kollektiv dörd görüş keçirmişdir.

Oqtay BAYRAMOV, "Xalq qəzeti"