"Kəpəz" - "Bakı" - 0:0, "Qəbələ" - "Neftçi" - 2:1, "Xəzər-Lənkəran" - "Rəvan" - 4:0, "Qarabağ" - AZAL - 2:0, "Turan" - "Simurq" - 1:1, " Sumqayıt" - "İnter" - 0:0.
Bu nəticələr Topaz Premyer Liqasının ötən şənbə və bazar günlərinə təsadüf etmiş 12-ci turunda qeydə alınmışdır. Hesabat turu ilə həm də çempionatın ikinci dövrəsinə start verilmişdir. Lakin müxtəlif səbəblər üzündən komandaların heç də hamısı 12 oyun keçirməmişdir. Yalnız yeddi klub - "Simurq", "Qarabağ", "Qəbələ", "Turan", "Rəvan", "Sumqayıt" və "Kəpəz" turnir məsafəsinin arxada qalan hissəsində bütün görüşlərdə meydana çıxmışlar. "İnter", "Xəzər-Lənkəran" və AZAL 11, "Bakı" 10, "Neftçi" 9 görüş keçirmişlər.
Turnir cədvəlində isə "ikihakimiyyətlilikdir". İlk iki pillədə irəliləyən "İnter" və "Simurq" 20 xal toplamışlar. Liderlərin ən yaxın izləyicisi "Qarabağ"ın 17 xalı vardır. Birinci altılıqda qalan üç yeri hərəyə 16 xala malik "Xəzər-Lənkəran", AZAL və "Qəbələ" tuturlar. "Neftçi" 15 xalla yalnız yeddinci mövqedə olsa da, Avropa Liqasında çıxışları ilə əlaqədar təxirə salınmış üç oyunda maksimum nəticə göstərəcəyi halda birinci pilləyə də yüksələ bilər.
On üçüncü turun görüşləri təqvimdə noyabrın 18-nə təyin edilmişdir. Lakin iki həftəlik fasilə zamanı azarkeşlər darıxmalı olmayacaqlar. Artıq noyabrın 8-də "Neftçi" Avroliqada qrup mərhələsinin ikinci dövrəsinə başlayıb öz meydançasında Kazanın "Rubin" klubunu qəbul edəcəkdir. Noyabrın 14-də isə Azərbaycan milli komandası dünya çempionatının seçmə yarışları çərçivəsində Belfastda Şimali İrlandiya yığmasının qonağı olacaq. Yeri gəlmişkən, bu oyunu Viktor Şvetsovun başçılığı ilə ukraynalı hakimlər briqadası idarə edəcəkdir.

Oqtay BAYRAMOV, "Xalq qəzeti"