Azərbaycanın "Lokomotiv" klubu kimi "Rabitə" də qadın voleybol komandaları arasında Çempionlar Liqası turnirinin qrup mərhələsində ardıcıl ikinci qələbəsini qazanmışdır.
Bakılılar bu dəfə İtaliyanın "Villa Korteze" komandasını qəbul etmiş və pərəstişkarlarını inamlı oyunla sevindirmişlər - 3:1. Bu müvəffəqiyyətdən sonra "Rabitə" 6 xalla qrupun turnir cədvəlində vahid liderdir. İkinci-üçüncü pillələrdə irəliləyən "Atom" (Polşa) və "Villa Korteze"nin 3 xalı vardır. "Agel" (Çexiya) hər iki oyunda uduzmuşdur.
"Lokomotiv" isə "F" qrupunun turnir cədvəlinə başçılıq edir. Bu komandamız startda Belqradda Serbiyanın "Srvena Zvezda" klubunu məğlubiyyətə uğratdıqdan sonra öz meydançasında Rusiyanın "Dinamo" (Moskva) kollektivi ilə görüşdə də güclü rəqibinə heç bir ümid yeri qoymamışdır - 3:0. Qrupda Bakı voleybolçularının daha bir rəqibi Polşanın "Fakro" klubudur.
Liqada Azərbaycan paytaxtının üçüncü təmsilçisi "Azərreyl", "Rabitə" və "Lokomotiv"dən fərqli olaraq, ikinci turda uğur qazana bilməmişdir. İstanbulda "Əczaçıbaşı" ilə oyunda Türkiyə voleybolçularının xeyrinə - 3:0 hesabı qeydə alınmışdır.
Qrupda itkisiz irəliləyən "Əczaçıbaşı" 6 xala malikdir. "Azərreyl" və "Drezdner" (Almaniya) müvafiq surətdə 3 və 2 xal toplamışlar. "Tauron"un (Polşa) isə 1 xalı var.
Avropa Voleybol Konfederasiyasının kuboku yarışlarında mübarizə aparan "İqtisadçı" və "Bakı-Azəryol" komandaları 1/16 finalda öz çıxışlarından razı qala bilərlər. Bu mərhələdə "Slidrext"ə (Hollandiya) hər iki oyunda 3:0 hesabı ilə qalib gələn "İqtisadçı" səkkizdəbir finalda tərkibində Azərbaycan milli komandasının oyunçusu Natalya Məmmədovanın da çıxış etdiyi Rusiyanın "Omiçka" klubu ilə qarşılaşacaq, Sloveniyanın "Nova Branik" komandasını turnirdə çıxışlarını dayandırmağa məcbur edən "Bakı-Azəryol" voleybolçularını isə səkkizdəbir finalda "Rote Raben" (Almaniya) ilə iki oyun gözləyir.

Oqtay BAYRAMOV, "Xalq qəzeti"