Danimarkalı hakimlər briqadası
Bakının "Neftçi" komandasının UEFA Avropa Liqası turnirinin qrup mərhələsinin üçüncü turu çərçivəsində bu gün Kazanda yerli "Rubin" klubuna qarşı keçirəcəyi görüşü Kenn Hansennin başçılıq etdiyi danimarkalı hakimlər briqadası idarə edəcəkdir. Oyun Bakı vaxtı ilə saat 21-də başlanacaqdır.
Bu arada o da məlum olmuşdur ki, görüş üçün satılan biletlərin qiyməti bölmələrdən asılı olaraq 150 rubldan 1000 rubladəkdir. Xatırladaq ki, iki turdan sonra "Rubin"in 4, "Neftçi"nin isə 1 xalı vardır.

Kubok yarışları "Kəpəz"in qələbəsi ilə başlandı
Futbol üzrə Azərbaycan kuboku yarışları Gəncənin "Kəpəz" komandasının qələbəsi ilə başlanmışdır. Mahmud Qurbanovun yetirmələri Zirə qəsəbəsindəki idman kompleksinin meydançasında keçirilmiş 1/16 final görüşündə Bakının "Qala" klubunu 4:2 hesabı ilə məğlubiyyətə uğratmışlar. Növbəti mərhələdə "Kəpəz"in rəqibi Ağdamın "Qarabağ" komandası olacaq.
Onaltıdabir final mərhələsinin qalan görüşləri dünən keçirilmişdir.

"Qran-Pri"nin ikiqat mükafatçısı
Azərbaycan idmançısı Lalə Yusifova Berlində keçirilmiş bədii gimnastika üzrə "Qran-Pri" yarışlarında inamla çıxış edərək ikiqat mükafatçı olmuşdur.
Həmyerlimiz gürzlərlə təmrinlərin yerinə yetirilməsində rusiyalı Darya Dmitriyevadan sonra ikinci nəticə göstərib fəxri kürsünün gümüş pilləsinə yüksəlmiş, lentlə hərəkətlərin icrasında isə bürünc medal qazanmışdır.