Doqquz turdan sonra
Milli futbol çempionatımızın doqquzuncu turuna ötən bazar günü "Sumqayıt" - "Rəvan" və "Xəzər-Lənkəran" - "Qəbələ" görüşləri ilə yekun vurulmuşdur. Bu oyunlardan heç birində meydan sahibləri qələbəni bayram edə bilməmişlər. Sumqayıtda qonaqlar yeganə qolla 3 xal qazanmışlar (1:0), Lənkəranda heç-heçə qeydə alınmışdır - 1:1.
Turun əvvəlki günlərdə keçirilmiş digər görüşləri isə belə nəticələnmişdir: "Neftçi" - "Kəpəz" - 4:1, "İnter" - "Simurq" - 1:0, "Turan" - "AZAL" - 1:0, "Qarabağ" - "Bakı" - 1:1.
Doqquz turdan sonra turnir cədvəlinə başçılıq edən "Simurq"un 18 xalı vardır. "İnter" 15 xal toplamışdır. Üçüncü mövqedə olan "Qarabağ" 14 xala malikdir. Liderlər üçlüyünün ən yaxın izləyicisi "Neftçi" 12 xalla dördüncü mövqedədir. Lakin ölkə çempionumuz Avropa Liqası turnirində çıxışları ilə əlaqədar Azərbaycan çempionatında hələlik yalnız altı oyunda meydançaya çıxmışdır. Yeri gəlmişkən xatırladaq ki, bakılılar Liqanın qrup mərhələsində üçüncü görüşlərini oktyabrın 25-də Kazanda yerli "Rubin"ə qarşı keçirəcəklər.

Sankt-Peterburqa, beynəlxalq turnirə
Azərbaycan şahmatçıları, bu yaxınlarda SOCAR-ın tərkibində klublararası Avropa çempionatının qızıl medalını qazanmış Eltac Səfərli, eləcə də Vasif Durarbəyli, Ülvi Bacarani və Zaur Məmmədov Sankt-Peterburqa səfərə hazırlaşırlar. Onlar Neva sahillərində Mixail Çiqorinin xatirəsinə həsr edilən 19-cu beynəlxalq turnirin mükafatları uğrunda mübarizə aparacaqlar.
Oktyabrın 27-də başlanıb noyabrın 4-də finişə çatacaq bu yarışda 280 şahmatçı, o cümlədən 75 qrossmeyster çıxış edəcək. Turnirdə həmyerlilərimizin rəqibləri Aleksey Şirov (Latviya), Zoltan Almaşi (Macarıstan), Pavel Elyanov (Ukrayna), Krişnan Saşikiran (Hindistan), Nikita Vityuqov (Rusiya), İlya Smirin (İsrail) kimi tanınmış şahmatçılar olacaqlar.
Beynəlxalq turnir iştirakçılarının siyahısında Səfərli (2616) reytinqə görə 19-cu, Durarbəyli (2584) 34-cü, Məmmədov (2442) 84-cü, Bacarani isə (2436) 86-cıdır.

Oqtay BAYRAMOV, "Xalq qəzeti"