Beynəlxalq Şahmat Federasiyasının (FİDE) 2012 - 2013-cü illər üçün "Qran-Pri" yarışları seriyasından Londonda keçirilən birinci mərhələnin ilk üç turunda ən yaxşı nəticəni azərbaycanlı Şəhriyar Məmmədyarov, İsrail təmsilçisi Boris Gelfand və macar Peter Leko göstərmişlər.
Qrossmeysterimiz startda Vasili İvançuk (Ukrayna) və Maykl Adams (İngiltərə) ilə görüşlərdə heç-heçələrdən sonra üçüncü turda hollandiyalı Aniş Girini sınağa çəkmiş və 21-ci gedişdə rəqibini məğlubiyyətlə barışmağa məcbur etmişdir.
Üç turdan sonra Məmmədyarov, Gelfand və Leko hərəyə 2 xalla turnirin liderləri olmuşlar. Bu turlarda Hikaru Nakatura (ABŞ), Leniyer Dominges (Kuba), Veselin Topalov (Bolqarıstan), Aleksandr Qrişuk (Rusiya), Van Hao (Çin) və Adams 1,5, Giri, İvançuk və özbəkistanlı Rüstəm Qasımcanov 1 xal toplamışlar.
Dairəvi sistem üzrə keçirilən turnirdə dünən axşam dördüncü turun görüşləri oynanılmışdır. Məmmədyarov bu dəfə Qrişukla qarşılaşmışdır.

Oqtay BAYRAMOV, "Xalq qəzeti"