Azərbaycan millisi futbol üzrə "FIFA U-17 qadınlararası dünya çempionatı Azərbaycan - 2012"də ilk oyununu keçirmişdir. Sentyabrın 22-də Tofiq Bəhramov adına Respublika stadionunda millimiz Kolumbiya yığmasını qəbul etmişdir.
Azərbaycan millisinin start heyətində Aytac Şərifova, Jalə Məhsimova, Ləman Bağırova, Maya Danqadze, Əminə Heydərova (kapitan), Nigar Cəlilli, Şəfəq Nəsirova, Süheyla İltar, Melis Sarıaltın, Olya Şioşvili və Leyla Solmaz meydançaya çıxmışlar.
Kolumbiya millisi isə aşağıdakı heyətlə yarışa başlamışdır: Lissa Kordozo, Diana Duarte, Estefania Botero, Dayana Kastillo (kapitan), Karolina Arbelaz, Lesi Santos, Culiana Okampo, Maria Caramillo, Anyella Martinez, Gabriella Maldonado və Marsela Restrepo.
Yaponiyalı baş hakim Etsuko Fukanonun idarə etdiyi görüşün 17-ci dəqiqəsində kolumbiyalı futbolçu Dayana Kastillo hesabı açmışdır. Üç dəqiqə sonra D.Kastillo dubl etmişdir. Matçın 44-cü dəqiqəsində Kolumbiya yığmasının heyətində Gabriella Maldonado fərqlənmişdir. Beləliklə, görüşün ilk hissəsi Kolumbiya millisinin 3:0 hesablı üstünlüyü ilə başa çatmışdır.
Fasilədən sonra qarşılaşmanın 73-cü dəqiqəsində Kolumbiya yığmasının üzvü Laura Aquirre dördüncü topu Azərbaycan millisinin qapısından keçirmişdir. Beləliklə, Azərbaycan millisi dünya çempionatında keçirdiyi ilk görüşündə 0:4 hesabı ilə məğlub olmuşdur.

AzərTAc