Qazaxıstanın Pavlodar şəhərində beynəlxalq turnir keçirilmişdir. Azərbaycan, Rusiya, Ukrayna, Moldova, Çin, Özbəkistan, Qırğızıstan və Qazaxıstan idmançılarının iştirak etdiyi yarışda ölkəmizi "Qızıl əlcək" idman klubunun boksçuları təmsil etmişlər. Turnirdə 60 kq çəki dərəcəsində iştirak edən gənc dəri əlcək ustamız Şaban Şahpələngov bütün döyüşlərini yüksək səviyyədə keçirərək, qızıl medala layiq görülmüşdür. 
"Qızıl əlcək" idman klubunun baş məşqçisi, əməkdar məşqçi Rəhim Allahverdiyev yetirməsi Şabanın bütün döyüşlərdə yüksək texnika nümayiş etdirdiyinə görə, turnirin "Ən texnikalı boksçu"su adına layiq görüldüyünü bildirdi.
O, Şabanın ən gərgin döyüşünü Çin idmançısı ilə keçirdiyini, rəqibinə texniki hazırlığa görə qalib gəldiyini dedi və qeyd etdi ki, Şaban final görüşündə Qazaxıstan idmançısını nakautla məğlub etdi.

Leyla QURBANOVA, "Xalq qəzeti"