Sentyabrın 12-də XIV London Paralimpiya Oyunlarından Vətənə qayıtmış Azərbaycan idmançıları ulu öndər Heydər Əliyevin abidəsini ziyarət etmişlər.
İdmançılarımız maşın karvanının müşayiəti ilə hava limanından birbaşa Heydər Əliyev adına Sarayın qarşısındakı parka gələrək, müstəqil dövlətimizin memarı və qurucusu, Azərbaycanda bədən tərbiyəsi və idmanın inkişafına, gənc nəslin sağlam və vətənpərvərlik ruhunda böyüməsinə daim böyük diqqət və qayğı göstərmiş ulu öndərin xatirəsini ehtiramla anmış, onun abidəsi önünə əklil və gül dəstələri qoymuşlar.
Qeyd edək ki, London Paralimpiya Oyunlarında Azərbaycan idmançıları 12 medal qazanmışlar. Azərbaycanın paralimpiya yığması bu göstərici ilə iştirakçı ölkələr arasında 27-ci olmuşdur.

AzərTAc