Artıq yeddinci ildir ki, gənclik şəhərində bələdiyyənin məhəllə komitələrinin 11-12 yaşlı uşaqlardan ibarət komandaları arasında 15 İyun - Milli Qurtuluş Gününə həsr edilmiş futbol yarışları keçirilir. 
Builki yarışlara ənənə üzrə M.Hüseynzadə adına şəhər stadionunda start verilmişdir. Üç ayadək davam edən turnirin oyunları əsasən məktəb ərazilərindəki futbol meydanlarında təşkil olunmuş, final mərhələsi isə şəhər stadionunda keçirilmişdir. Dörd yarımqrupda 20 komandanı təmsil edən 280-ə qədər gənc futbolçu mübarizə aparmışdır. Sumqayıt bələdiyyəsi, gənclər və idman baş idarəsi, həmçinin Şimal Regional Futbol Federasiyasının birgə yaratdığı təşkilat komitəsi oyunları AFFA tərəfindən təsdiqlənmiş qaydalar çərçivəsində, mütəşəkkil formada keçirmişdir. Matçları12 nəfərdən ibarət ixtisaslı hakimlər briqadası idarə edirdi.
Final mərhələsinin yekununa həsr olunmuş mərasimdə Sumqayıt bələdiyyəsinin sədri Əbülfəz Babayev, regional federasiyanın sədri Yaşar Şamilov, gənclər və idman baş idarəsi rəisinin müavini Mübariz Bəşirov çıxış etmişlər. Ölkəmizdə futbolun kütləviliyinin təmin edilməsi, futbolun inkişafına dair dövlət proqramının icrası baxımından bu yarışların əhəmiyyəti xüsusi vurğulanmışdır. Natiqlər yeniyetmə futbolçulara tövsiyələr vermiş, ən xoş arzularını bildirmişlər.
Sonra qaliblər elan olunmuşdur. 6-cı mikrorayon üzrə 1 saylı məhəllə komitəsinin komandası I yerə sahiblənmişdir. 45-ci məhəllənin futbolçuları II, Kottec yaşayış massivi üzrə komanda isə III yeri tutmuşlar.
Qaliblər "Sumqayıt bələdiyyəsi kuboku" və fəxri-fərmanlarla təltif edilmişlər. Daha çox fərqlənən iştirakçılara hədiyyələr verilmişdir.

Əli ƏLİYEV, "Xalq qəzeti"