Londonda keçiriləcək XXX Yay Olimpiya Oyunlarında iştirak edəcək idmancılarımız bu mötəbər beynəxalq yarışa hazırlıq prosesini artıq başa çatdırmışlar. Yaxın günlərdə isə ölkəmizi Olimpiya Oyunlarında təmsil edəcək nümayəndə heyətimiz İngiltərə paytaxtına yola düşəcəkdir. 
Xatırladaq ki, idmançılarımızın Londonda ölkəmizi layiqincə təmsil etmələri üçün onlara hərtərəfli dəstək göstərilmiş, hazırlıq prosesinin uğurla keçirilməsinə lazımi şərait yaradılmışdır. Azərbaycanın idman, Olimpiya Hərəkatına lazımi dəstək göstərən bp-Azərbaycan şirkəti də bu ilin əvvəllərində London Olimpiadasında iştirak edəcək 7 idmançımıza sponsorluq etməyi öz üzərinə götürmüşdü.
Şirkət dəstəklədiyi 7 idmançının yolasalma mərasimini keçirmişdir. Tədbirdə çıxış edən bp-nin Azərbaycan, Gürcüstan və Türkiyə üzrə regional prezidenti Rəşid Cavanşir bu il yanvarın 26-da şirkət ilə Azərbaycan Milli Olimpiya və Milli Paralimpiya komitələri arasında 2012-ci ildə Londonda keçiriləcək 30-cu Olimpiya Oyunlarına hazırlaşan Azərbaycan milli komandalarının və bir qrup seçilmiş idmançının dəstəklənməsi üçün tərəfdaşlıq müqaviləsinin imzalandığını xatırlatmışdır. Qeyd olunmuşdur ki, müqavilə Olimpiya və Paralimpiya Oyunlarına hazırlaşan Azərbaycan milli komandalarına və seçilmiş 7 idmançıya dəstək vermək məqsədi daşıyırdı.
"bp"-Azərbaycan şirkətinin Milli Olimpiya və Paralimpiya komitələrinə, həmçinin "London-2012" Yay Olimpiya Oyunlarına hazırlaşan bir qrup idmançıya dəstək verməkdən məmnun qaldığını diqqətə çatdıran R. Cavanşir onların bu mötəbər yarışda Azərbaycanı layiqincə təmsil edib Vətənə medallarla qayıdacağına əminliyini bildirmişdir. Eyni zamanda, bp hələ uzun müddət regionda güclü və dayanıqlı iqtisadiyyata malik lider ölkə kimi öz strateji roluna doğru irəliləyən Azərbaycanda qalaraq uğurlarını davam etdirmək niyyətindədir. R. Cavanşir London Olimpiadasında ölkəmizi təmsil edəcək İlham Zəkiyevə və Afaq Sultanovaya şirkətin xüsusi hədiyyəsini təqdim etmiş, idmançılarımıza uğurlar arzulamışdır.
Mərasimdə çıxış edən gənclər və idman naziri Azad Rəhimov, Azərbaycan Milli Olimpiya Komitəsinin vitse-prezidenti Çingiz Hüseynzadə, Milli Paralimpiya Komitəsinin prezidenti İlqar Rəhimov bp-nin ölkəmizdə idmana göstərdiyi diqqəti yüksək qiymətləndirmişlər. Qeyd olunmuşdur ki, Azərbaycan idmançıları artıq London Yay Olimpiya Oyunlarına 50-dən çox lisenziya qazanmışlar. Olimpiya Oyunlarına qazanılan lisenziyaların sayının getdikcə artmasının, eləcə də budəfəki yarışlarda idmançılarımızın daha çox idman növlərində təmsil olunmalarının dövlətimizin idmana göstərdiyi qayğının məntiqi nəticəsi kimi dəyərləndirən natiqlər son illər Prezident İlham Əliyevin idmancılarımız üçün yaratdığı hərtərəfli şəraitdən söhbət açmışlar. Qeyd edilmişdir ki, 2012-ci ilin "İdman ili" elan olunması, eləcə də bu tərəfdaşlıq cəmiyyətdə, xüsusən də gənclər arasında idmana marağı daha da artıracaqdır.
Cüdo üzrə ikiqat Paralimpiya Oyunları çempionu, ikiqat dünya və dördqat Avropa çempionu İlham Zəkiyev göstərilən etimada görə minnətdarlığını bildirmiş və onlara bəslənilən ümidləri doğruldacaqlarına söz vermişdir.
Yeri gəlmişkən, "bp-Azərbaycan" şirkəti Azərbaycan Milli Olimpiya və Milli Paralimpiya komitələrinin "London-2012" Olimpiya Oyunlarında rəsmi tərəfdaşıdır. Şirkət, həmçinin Londonda medallar uğrunda mübarizə aparacaq 3 olimpiya və 4 paralimpiya idmançısının - Cəbrayıl Həsənovun (sərbəst güləş), Fəridə Əzizovanın (taekvondo), Rövşən Bayramovun (yunan-Roma güləşi), İlham Zəkiyevin (cüdo), Afaq Sultanovanın (cüdo), Oloxan Musayevin (atletika), Oleq Panyutinin (atletika) Yay Olimpiya Oyunlarına hazırlığını, həm də bu oyunlarda iştiraklarını dəstəkləyir.

Mirbağır YAQUBZADƏ, "Xalq qəzeti"