İyunun 15-dən 18-dək "Sərhədçi" İdman Olimpiya Mərkəzində sərbəst və yunan-Roma güləşi üzrə böyüklər arasında Azərbaycan çempionatı başlanacaq. Azərbaycan Respublikası Gənclər və İdman Nazirliyi və Azərbaycan Güləş Federasiyasının birgə təşkilatçılığı ilə keçirilən yarışlarda 18 yaşı tamamlanmış, 1992-ci il təvəllüdlü və yuxarı yaşlı idmançılar iştirak edəcəklər.
Güləş Federasiyasının informasiya və ictimaiyyətlə əlaqələr şöbəsindən verilən məlumata görə, şəxsi xarakter daşıyan yarışlarda idman cəmiyyətləri, idman klubları, idman təşkilatları, şəhər və rayon yığma komandalarının tərkibinə daxil olan idmançılar mübarizə aparacaq. Şəxsi yarışda çəki dərəcələri üzrə ilk 3 yeri tutmuş idmançılar AGF tərəfindən müvafiq diplom, medal və pul mükafatları ilə təltif olunacaqlar. Xatırladaq ki, həmin güləşçilər ölkə yığma komandasının heyətinə cəlb olunacaqlar. Bundan əlavə, cempionat günlərində yeniyetmələr arasında "Regionlar kuboku" uğrunda komanda birinciliyinin final görüşləri də keçiriləcək. Sərbəst güləş üzrə finalda AGF-in 7 və 2 saylı, yunan-Roma güləşi üzrə isə 1 və 6 saylı nümayəndəliklərinin komandaları mübarizə aparacaq.{nl}