Qrossmeyster Teymur Rəcəbov Moskvada yenicə finişə çatmış 8-ci dünya çempionu Mixail Talın xatirəsinə həsr edilən ənənəvi superturnirin üç qalibindən biri olmuşdur. Azərbaycan şahmatının lideri sonuncu turda qara fiqurlarla oynadığı görüşdə ABŞ təmsilçisi Nikaru Nakamura ilə heç- heçəyə razılaşaraq on məşhur rəqibin iştirakı ilə keçirilən bu mötəbər yarışda çıxışlarını 5 xalla başa vurmuşdur (2 qələbə, 6 heç- heçə, 1 məğlubiyyət).
Şahmatçımız turnirdə onunla eyni nəticə göstərən italiyalı Fabiano Karuana ilə ikinci- üçüncü yerləri bölüşdürmüşdür. Xatirə yarışının qalibi adını isə 5,5 xalla Maqnus Karlsen (Norveç) qazanmışdır. Rusiyalılar Aleksandr Morozeviç, Aleksandr Qrişuk, Vladimir Kramnik, Levon Aronyan ( Ermənistan) 4,5, Nakamura və ingilis Lük Makşeyn 4, Yevgeni Tomaşevski ( Rusiya) 3,5 xal toplamışlar.
Qeyd edək ki, Rəcəbov turnirdə uğurlu nəticə sayəsində öz reytinqini bir qədər də artıraraq 2784-dən 2788-ə çatdırmışdır. Qarşıda isə Teymuru və Azərbaycan milli komandasının digər üzvü Vüqar Həşimovu iyulun birinci ongünlüyündə Astanada (Qazaxıstan) keçiriləcək blits və rapid üzrə dünya çempionatı gözləyir.

Oqtay BAYRAMOV, "Xalq qəzeti"