Bu gün Moskvada 8-ci dünya çempionu Mixail Talın xatirəsinə həsr edilmiş şahmat üzrə beynəlxalq turnirin açılış mərasimi olacaqdır. Bu ənənəvi yarışın mükafatları uğrunda on qrossmeyster, o cümlədən Azərbaycan şahmatının lideri Teymur Rəcəbov mübarizə aparacaq.
Dairəvi sistem üzrə keçirilib doqquz turdan ibarət olan turnirdə təmsilçimizi rusiyalılar Vladimir Kramnik, Aleksandr Qrişuk, Aleksandr Morozeviç, Yevgeni Tomaşevski, Maqnus Karlsen (Norveç), Levon Aronyan ( Ermənistan), Hikaru Nakamura (ABŞ), Fabiano Karuana (İtaliya) və Lük Makşeynə (İngiltərə) qarşı görüşlər gözləyir.
Turnirin ümumi mükafat fondu 100 min avrodur. Birinci turun görüşləri sabah keçiriləcəkdir. Yarışın qalibi və mükafatçıları iyunun 18-də məlum olacaq.
Moskvada xatirə turniri başa çatdıqdan iki həftə sonra isə Rəcəbov həmyerlisi Vüqar Həşimovla birlikdə Astanada (Qazaxıstan) rapid və blits üzrə dünya çempionatında iştirak edəcək. İyulun birinci günü başlanacaq çempionatda təmsilçilərimizin rəqibləri Karlsen, Aronyan, Kramnik və Morozeviçlə yanaşı, rusiyalı Sergey Karyakin, hindistanlı Vişvanatan Anand, bolqar Veselin Topalov, ukraynalı Vasili İvançuk və başqaları olacaq.

Oqtay BAYRAMOV, "Xalq qəzeti"