Püşk Azərbaycana hansı ölkələri rəqib seçəcək?

Azərbaycanın 17 yaşlı qadınlardan ibarət yığma komandası sentyabrın 22-dən oktyabrın 13-dək ölkəmizdə keçiriləcək dünya çümpionatının ilkin mərhələsində hansı komandalarla bir qrupda çıxış edəcək? Biz bu suala iyulun 6-da cavab alacağıq. 
Həmin gün saat 19-da Bakıdakı Beynəlxalq Muğam Mərkəzində püşk atılacaq və dünya çempionatının medallarını qazanmaq iddiasında olan 16 komanda dörd qrupa bölünəcəkdir. Onlardan 14-ü artıq məlumdur. Bunlar təşkilatçı ölkə Azərbaycan yığması ilə yanaşı, Çin, Yaponiya, Koreya, Qambiya, Qana, Nigeriya, Kanada, Meksika, ABŞ, Braziliya, Kolumbiya, Uruqvay və Yeni Zelandiyadır. Daha iki komanda isə iyunun 26-29-da Avropa zonasında keçiriləcək oyunlardan sonra məlum olacaq.

Diplomatlarımızın komandası birinci olmuşdur
Qazaxıstanda dünya ölkələrinin bu respublikadakı diplomatik nümayəndələrinin komandaları arasında qarşıdakı Avropa çempionatına həsr olunmuş futbol turniri keçirilmişdir.
Bu barədə azerisport-un yaydığı xəbərdə bildirilir ki, turnirin qalibi adını bütün görüşlərdə rəqiblərini məğlubiyyətə uğradan Azərbaycan səfirliyinin komandası qazanmışdır.

Oqtay BAYRAMOV, "Xalq qəzeti"