Xəbər verdiyimiz kimi, Azərbaycan boksçusu Məhəmməd Abdulhəmidov ( 56 kq) Türkiyənin Trabzon şəhərində keçirilən olimpiya təsnifat turnirinin dörddəbir final mərhələsində Denis Makarova ( Almaniya) qalib gəlib yarımfinala çıxmaqla London Olimpiadasına lisenziya qazanmaq vəzifəsini vaxtından əvvəl yerinə yetirmişdir.
Onun bu müvəffəqiyyəti sayəsində olimpiyaçı olmaq hüququnu əvvəlki yarışlarda sübuta yetirmiş dəri əlcək ustalarımızın olimpiya "biletlərinin" sayı 6-ya çatmışdır.
Təmsilçimizin qələbəsinə sevindiyimiz axşam Azərbaycanın daha bir boksçusu dörddəbir final döyüşü sınağından şərəflə çıxmışdır. Vətən Hüseynli (81 kq ) fransalı rəqibini məğlubiyyətə uğradıb məqsədə bir qədər də yaxınlaşmışdır. Növbəti uğurlu döyüşdən sonra onu olimpiya lisenziyasından cəmi bir qələbə ayırır. Əgər Hüseynli yarımfinalda ingiltərəli Smitin də öhdəsindən gəlməyi bacarsa, Olimpiada rinqinə çıxmağa hazırlaşan Azərbaycan boksçularının sıraları bir qədər də genişlənəcək.

Oqtay BAYRAMOV, "Xalq qəzeti"