Azərbaycan boksçuları Türkiyənin Trabzon şəhərində London Olimpiadasına lisenziya turnirinə inamla başlamışlar. Yarışın ilk iki günü dörd görüş keçirən dəri əlcək ustalarımız bu döyüşlərin hamısında rinqi qələbə ilə tərk etmişlər.
Vətən Hüseynli (81 kq) iki rəqibinin öhdəsindən gəlməyi bacarmışdır. Startda ispaniyalı Abner Ernandesi məğlubiyyətə uğradan boksçumuz ertəsi gün Mateuş Triçi ( Polşa ) ilə gərgin mübarizədə də rəqibindən güclü olmuşdur.
Elvin İsayev (60 kq ) turnirə rumıniyalı Aleksandr Çuçirianu üzərində qələbə ilə başlamış, Tamerlan Abdullayev ( 69 kq ) isə Bolqarıstan təmsilçisi Simeon Çxamova qalib gəlib növbəti mərhələdə İrlandiya boksçusu ilə görüşmək hüququ qazanmışdır.
Qeyd edək ki, Azərbaycan Trabzon rinqində beş nəfərlə təmsil olunur. Qardaş ölkəyə olimpiya lisenziyası arxasınca getmiş digər iki boksçumuz Salman Əlizadə ( 49 kq ) və Məhəmməd Abdulhəmidovdur (56 kq ).
Bundan əvvəlki lisenziya xarakterli yarışlarda Azərbaycan Londona beş çəki dərəcəsində lisenziya qazanmışdır. Hazırda Avropa təsnifat turnirində döyüşən boksçularımız da qarşılarında duran vəzifənin öhdəsindən gəlmək əzmindədirlər. Əgər onlar bu məqsədə çatsalar, yığma komandamız XXX Yay Olimpiya Oyunlarında çox mötəbər bir heyətlə mübarizə aparacaq.
Dünən, turnirin üçüncü günü Azərbaycan təmsilçilərini daha üç görüş gözləyirdi. Əlizadə almaniyalı rəqibinə, Abdulhəmidov Macarıstan idmançısına, İsayev isə Türkiyə boksçusuna qalib gəlib ilk uğurlarımızı bir qədər də inkişaf etdirməyə çalışacaqdılar.

Oqtay BAYRAMOV, "Xalq qəzeti"