Bakı 2020-ci il Yay Olimpiya və Paralimpiya Oyunlarına ev sahibliyi etmək üçün növbəti mərhələyə keçməyə layiqdir.
Gənclər və İdman Nazirliyinin mətbuat xidmətindən bildirmişlər ki, bu sözləri 2018-ci ildə Rusiyada keçiriləcək FİFA dünya kuboku yarışlarının təşkilat komitəsinin icraçı direktoru Aleksey Sorokin demişdir.
Vurğulanmışdır ki, Doha, İstanbul, Madrid və Tokio kimi rəqibləri ilə birgə Milli Olimpiya Komitələri Assosiasiyasının XVIII Baş Assambleyasında etdiyi yüksək səviyyəli təqdimatı ilə "Bakı 2020" nümayəndə heyəti hər kəsi heyrətləndirməyi bacardı. Azərbaycanın birinci xanımı, Heydər Əliyev Fondunun prezidenti Mehriban Əliyevanın 10 dəqiqəlik təqdimatına Hollivud rejissoru Rupert Vaynraytın çəkdiyi qısa film daxil edilmişdi ki, bu da böyük sürpriz oldu. Mehriban xanım Əliyevanın çıxışı və təqdimat çox gözəl idi. Görünür ki, ölkə həqiqətən 2020-ci il Yay Olimpiya və Paralimpiya oyunlarına ev sahibliyi etmək hüququna layiqdir.
Qeyd edilmişdir ki, mayın 23-də Kanadanın Kvebek şəhərində Beynəlxalq Olimpiya Komitəsinin idarə heyətinin qərarına əsasən bütün beş şəhərin növbəti mərhələyə keçməsi daha məqsədəuyğun olardı. Beynəlxalq Olimpiya Komitəsi bütün ölkələrə mübarizəni davam etdirmək üçün imkanlar yaradacaqdır. Nəzərə almaq lazımdır ki, Roma artıq mübarizədən geri çəkilmişdir. Hazırkı durumda bütün namizəd şəhərlər finala çıxmağa layiqdirlər.

AzərTAc