Avstriyadan gümüş medalla

Azərbaycan cüdoçusu İlqar Muşkiyev Avstriyanın Obervart şəhərində başa çatmış Dünya kuboku turnirinin gümüş mükafatçısı olmuşdur. 
Finala aparan yolda Avstriya, Bolqarıstan, İsveçrə və Koreya idmançılarını məğlubiyyətə uğradan həmyerlimiz yalnız həlledici görüşdə Gürcüstan təmsilçisinə uduzaraq 60 kq çəki dərəcəsində ikinci yeri tutmuş və özünün reytinq xalları ehtiyatını bir qədər də artırmışdır.
Muşkiyevin bu müvəffəqiyyəti, eləcə də Elmar Qasımovun (100 kq) yeddinci yeri tutması Azərbaycan yığmasına komanda hesabında çıxışlarını səkkizinci pillədə başa vurmaq imkanı vermişdir.

Superliqada "Bakı" liderdir
Qadın voleybol komandaları arasında Azərbaycan Superliqasında səkkizinci turun görüşləri belə nəticələnmişdir: "Azəryolservis" - "İqtisadçı" - 1:3, "Bakı" - "Lokomotiv" - 3:1, "Lokomotiv Biləcəri" - "Azərreyl" - 0:3.
Bu turdan sonra turnir cədvəlinə "Bakı" başçılıq edir. Lider yeddi görüşdə 12 xal toplamışdır. İkinci pillədə irəliləyən "Azərreyl"in altı oyundan sonra 11 xalı vardır. Üçüncü yeri tutan "Rabitə" beş görüşdə 10 xal qazanmışdır.

Oqtay BAYRAMOV, "Xalq qəzeti"