Dünən axşam Moskvada "Aeroflot Open" beynəlxalq şahmat festivalının açılış mərasimi olmuşdur. Sayca 11-ci dəfə keçirilən bu festival üç turniri ( "A", "B", "C") və blits yarışını özündə birləşdirir. Festivalın ən nüfuzlu-A turnirində 77 iştirakçı, o cümlədən 75 qrossmeyster mübarizə aparacaq. Onlardan üçü Azərbaycan şahmat məktəbinin yetirmələri Qədir Hüseynov, Rauf Məmmədov və Eltac Səfərlidir. "B" turnirində isə ölkəmizi qrossmeyster Namiq Quliyev təmsil edəcək. Təşkilatçılar festival üçün 150 min avro məbləğində ümumi mükafat fondu təsis etmişlər. "A" turnirinin qalibi 20 min avro qazanacaq. Bu yarışın ən yaxşı iştirakçısı həm də iyul ayında Almaniyanın Dortmund şəhərində keçiriləcək superturnirə dəvət olunacaq.
Doqquz turdan ibarət "Aeroflot Open" festivalında ilk görüşlər bu gün oynanılacaq. Qalib və mükafatçılar isə fevralın 15-də məlum olacaq. Fevralın16-da blits yarışı keçiriləcək.
Oqtay BAYRAMOV, "Xalq qəzeti"