Azərbaycan klublarının qadın voleybol komandaları arasında Çempionlar Liqası turnirinin pley-off mərhələsinə səfər görüşləri ilə başlayacağı məlum idi. Artıq oyunların vaxtı da müəyyənləşmişdir. "Azərreyl" səkkizdəbir finalın ilk görüşünü fevralın 1-də İsveçrədə yerli "Volero"ya qarşı keçirəcək, "Rabitə" isə həmin gün Polşada "Atom"komandasının qonağı olacaq.
Bakıda cavab görüşləri bundan bir həftə sonra keçiriləcəkdir. "Azərreyl" rəqibini fevralın 8-də, "Rabitə" isə ertəsi gün qəbul edəcək.
Çellenc kuboku yarışlarının səkkizdəbir final mərhələsi də elə həmin günlərə təsadüf edəcəkdir. "Lokomotiv"in Serbiyanın "Vizura" komandası ilə görüşləri fevralın 1-də Bakıda və 8-də Belqradda baş tutacaq. "Bakı" Xorvatiyanın "Rieka" klubu ilə mübarizəyə fevralın 2-də paytaxtımızda başlayacaq, səfərdə cavab görüşünü isə fevralın 8-də keçirəcəkdir.
Göründüyü kimi, fevralın birinci ongünlüyü böyük maraqla gözlənilən görüşlərlə zəngin olacaq. Bakının birdən-birə dörd komandası Avropa meydanlarında çətin sınaq ərəfəsindədir. İdman həvəskarlarımızın voleybol həyəcanı davam edir.

Oqtay BAYRAMOV, "Xalq qəzeti"