Azərbaycan şahmatçısı Teymur Rəcəbov Hollandiyanın Veyk-an-Zeye şəhərində keçirilən superturnirdə qələbələrinin hesabını açmışdır. Startda ardıcıl iki heç-heçədən sonra qrossmeysterimiz üçüncü turda çexiyalı David Navaranı sınağa çəkmiş və ilk qələbə sevinci yaşamışdır. Vüqar Həşimov isə Lük van Veli (Hollandiya) ilə görüşdə heç-heçəyə razılaşmışdır.
Rəcəbov - Navara görüşü kimi, turun daha iki oyunu məhsuldar olmuşdur. Sergey Karyakin (Rusiya) hollandiyalı Aniş Giriyə, Maqnus Karlsen (Norveç) isə Levon Aronyana (Ermənistan) qalib gəlmişlər.
Üç turdan sonra 2,5 xala malik Karlsen vahid liderdir. İkinci-dördüncü yerləri hərəyə 2 xal toplayan Rəcəbov, Aronyan və italiyalı qrossmeyster Fabiano Karuana tuturlar. Həşimovun 1 xalı vardır.
Dünən axşam keçirilən dördüncü turda Teymuru mayda Moskvada təşkil olunacaq şahmat tacı uğrunda matçda hazırkı dünya çempionu hindistanlı Vişvanatan Anandın rəqibi israilli Boris Gelfand ilə görüş gözləyirdi, Həşimov isə keçmiş dünya çempionu Veselin Topalova (Bolqarıstan) qarşı oynamağa hazırlaşırdı. Üçüncü turda Gelfand - Topalov görüşünün heç-heçə nəticələndiyini də qeyd edək.

Oqtay BAYRAMOV, "Xalq qəzeti"