Almaniyanın Münhen şəhərində atılmış püşk nəticəsində kişilərdən ibarət komandalar arasında basketbol üzrə 2013-cü il Avropa çempionatının seçmə turnirində mübarizə aparacaq Azərbaycan kollektivinin rəqibləri müəyyənləşmişdir.
Yığmamız Almaniya, Bolqarıstan, İsveç və Lüksemburq komandaları ilə birlikdə "B" qrupunda çıxış edəcəkdir. Seçmə yarışları 2012-ci il avqustun 15-dən sentyabrın 11-dək keçiriləcəkdir. Rəqiblər altı qrupda yarışacaqlar. Hər qrupdan ən güclü iki komanda, habelə qruplarda üçüncü yerləri tutan kollektivlər arasında daha yaxşı nəticə göstərən dörd komanda final mərhələsinə vəsiqə qazanacaq. Azərbaycan basketbolçuları turnirə avqustun 15-də səfərdə Lüksemburq komandasına qarşı görüşlə başlayacaqlar.
Avropa çempionatının final mərhələsi 2013-cü ilin sentyabrında Sloveniyada təşkil olunacaq.