Bu gün Yunanıstanın kurort şəhəri Porto Karrasda kişi və qadın komandaları arasında şahmat üzrə Avropa çempionatının açılış mərasimi olacaq və birinci turun görüşləri keçiriləcəkdir. Kişilərin qitə birinciliyində 38, qadınların turnirində isə 28 rəqib mübarizə aparacaq.
Azərbaycanın kişilərdən ibarət komandası yarış iştirakçılarının siyahısında reytinqə görə Rusiya və Ukraynadan sonra üçüncü yerdədir. Qrossmeysterlərimiz Avropa çempionatında Teymur Rəcəbov, Vüqar Həşimov, Şəhriyar Məmmədyarov, Qədir Hüseynov və Eltac Səfərlidən ibarət heyətlə çıxış edəcəklər.
Çempionatın medallarına əsas namizədlər Azərbaycan, Rusiya və Ukrayna ilə yanaşı Ermənistan, Macarıstan, Fransa, Bolqarıstan, İngiltərə, Hollandiya və Almaniyadır. Adları çəkilən komandaların liderləri Rəcəbov, Peter Svidler (Rusiya), Vasili İvançuk (Ukrayna), Levon Aronyan (Ermənistan), Peter Leko (Macarıstan), Maksim Vaşye-Laqrav (Fransa), Veselin Topalov (Bolqarıstan), Maykl Adams (İngiltərə), Aniş Giri (Hollandiya) və Arkadi Naydiç (Almaniya) kimi məşhur qrossmeysterlərdir.
Xatırladaq ki, hazırda Avropa çempionu adını Azərbaycan komandası daşıyır. İki il əvvəl Serbiyanın Novi-Sad şəhərində keçirilmiş qitə birinciliyinin qızıl medalları bizim şahmatçılara təqdim olunmuşdu. İndi isə yığmamız çempion adını qoruyub-saxlamaq uğrunda mübarizə aparacaq. Ona ikiqat Avropa çempionu olmağı arzulayaq.
Qadın komandalarının reytinq siyahısına Rusiya, Ukrayna və Gürcüstan üçlüyü başçılıq edir. Azərbaycan siyahıda 17-ci pillədədir. Həmyerlilərimiz Avropa çempionatında Zeynəb və Türkan Məmmədyarovalar, Gülnar Məmmədova, Nərmin Kazımova və Nərgiz Umudovadan ibarət heyətlə mübarizə aparacaqlar. Bu komandamız da 2009-cu ilin oktyabrında Novi-Sadda uğurla çıxış etmiş, kifayət qədər yüksək dördüncü yeri tutmuş və gümüş mükafatçı Ukraynadan yalnız əlavə göstəricilərə görə geri qalmışdı. Görək, qızlar bu dəfə necə nəticə göstərəcəklər?
Əlavə edək ki, Avropa çempionatı İsveçrə sistemi üzrə keçirilir və doqquz turdan ibarətdir. İlk səkkiz tur Bakı vaxtı ilə saat 18-də, sonuncu tur isə 16-da başlanacaq. Çempion, habelə gümüş və bürünc medalların sahibləri noyabrın 11-də məlum olacaq.

Oqtay BAYRAMOV, "Xalq qəzeti"