Türkiyənin Kocaeli şəhərində 16 yaşlı oğlanlardan ibarət komandalar arasında Ümumdünya Şahmat Olimpiadası start ərəfəsindədir. Yarışın saytında yerləşdirilmiş siyahıda Azərbaycan yığması reytinqə görə ikincidir - 2361 xal. Siyahıya Rusiya komandası (2455) başçılıq edir. Üçüncü yerdə isə Hindistandır (2351).
Olimpiadada ölkəmizin şərəfini Ülvi Bacarani, Misrəddin İsgəndərov, Kənan İzzət, Nicat Abbasov və Şücaət Orucovadan ibarət heyət qoruyacaq. Komandamızın rəqibləri Rusiya və Hindistan şahmatçıları ilə yanaşı, Ermənistan (2323), İran (2297), Qazaxıstan (2201), Çexiya (2191), İsveçrə (2165), Türkiyə (2138), Malayziya (2058), Gürcüstan (2033) və bir sıra başqa ölkələrin təmsilçiləri olacaqlar. Starta cəmi 28 komanda çıxacaq.
Ümumdünya Olimpiadasının açılış mərasimi oktyabrın 24-də keçiriləcəkdir. Birinci turun matçları da elə həmin günə təyin edilmişdir. Oktyabrın 25-də, 26-da və 29-da rəqiblər bir gündə iki turun görüşlərini oynayacaqlar. Oktyabrın 28-də isə yarış iştirakçıları istirahət edəcəklər. Olimpiadaya oktyabrın 31-də 10-cu turla yekun vurulacaqdır.

Oqtay BAYRAMOV, "Xalq qəzeti"