Sentyabrda Fransanın Monpelye şəhərində keçirilmiş bədii gimnastika üzrə dünya çempionatında uğurla çıxış edərək çoxnövçülükdə bürünc medalla yanaşı, London Olimpiadasına lisenziya da qazanmış Azərbaycan idmançısı Aliyə Qarayeva öz zəngin mükafatlar kolleksiyasına daha bir medal əlavə etmişdir.
Ölkəmizdə bədii gimnastikanın lideri bu dəfə Çexiyanın Brno şəhərində təşkil edilən "Qran-Pri" yarışlarında fərqlənmişdir. Aliyə çoxnövçülükdə yalnız rusiyalılar Yevgeniya Kanayeva və Darya Dmitriyevadan geri qalaraq fəxri kürsünün üçüncü pilləsinə yüksəlmişdir.

Ardıcıl üç qələbə
Azərbaycan şahmatçısı Vüqar Rəsulov Sankt-Peterburqda M.İ.Çiqorinin xatirəsinə həsr edilmiş 18-ci beynəlxalq turnirin startında ardıcıl üç görüşdən qalib ayrılmışdır.
Birinci turda Estoniya təmsilçisi Roman Yezovu məğlubiyyətə uğradan təmsilçimiz növbəti iki oyunda rusiyalı rəqibləri Vladimir Froloçkin və Konstantin Sakayev üzərində qələbə qazanmışdır.
İsveçrə sistemi üzrə keçirilib doqquz turdan ibarət olan turnirin mükafatları uğrunda 200-dən çox iştirakçı mübarizə aparır. Üç turdan sonra 11 şahmatçı, o cümlədən Rəsulov hərəyə 3 xal toplamışlar. Dünən axşam keçirilən dördüncü turda Vüqar Aleksandr Xalifmanla (Rusiya) görüşmüşdür.

O.BAYRAMOV, "Xalq qəzeti"