Heydər Əliyev adına İdman-Konsert Kompleksində yenicə başa çatmış dünya çempionatında qızıl və gümüş medalla yanaşı, London Olimpiadasına 4 lisenziya qazanmış Azərbaycan boksçularından sonra daha bir idmançımız XXX Yay Olimpiya Oyunlarında iştirak etmək hüququnu sübuta yetirmişdir. Bu dəfə olimpiya vəsiqələrimizin sayını yüngül atlet Layeş Abdullayeva artırmışdır.
Təmsilçimiz Tbilisidə keçirilmiş Gürcüstan kuboku turnirində fərqlənmişdir. Abdullayevanın 3000 metr məsafəyə qaçışda göstərdiyi nəticə onun Olimpiada-2012-də çıxışını təmin etmişdir. Bununla da İngiltərə paytaxtında olimpiya startlarına çıxacaq Azərbaycan idmanı nümayəndələrinin lisenziyalarının sayı 23-ə çatmışdır.

Dünya çempionatı. "Rabitə" - "Çanq"
Azərbaycan çempionu, Çempionlar Liqasında sonuncu turnirin finalçısı Bakının qadınlardan ibarət "Rabitə" voleybol komandası Qətərin paytaxtı Doha şəhərində təşkil olunmuş klublararası dünya çempionatında bu gün ilk görüşünü keçirəcəkdir. Startda bizim qızların rəqibi Tailandın "Çanq" komandası olacaq.
Bu rəqiblər Braziliyanın "Osako" klubu ilə birlikdə "B" qrupunda çıxış edirlər. Qrupun ilk oyununda Braziliya voleybolçuları tailandlılara 3:1 hesabı ilə qalib gəlmişlər.
Daha üç komanda "Vakifbank" (Türkiyə), "Mirador" (Dominikan Respublikası) və "Keniya Prizons" (Keniya) klubları isə "A" qrupunda mübarizə aparırlar. Bu qrupda turnir "Vakifbank"ın "Mirador" üzərində qələbəsi ilə başlanmışdır - 3:0.
"Rabitə" ikinci görüşü sabah braziliyalılara qarşı keçirəcək. Qruplarda ilk iki yeri tutan komandalar yarımfinala çıxacaqlar. Dünya çempionu oktyabrın 14-nə təyin edilmiş final görüşündə müəyyənləşəcək.

Oqtay BAYRAMOV, "Xalq qəzeti"