Azərbaycanın SOCAR klubu Sloveniyanın Roqaşka-Slatina şəhərində 65 komandanın iştirakı ilə keçirilən şahmat üzrə Avropa çempionatında ardıcıl ikinci qələbəsini qazanmışdır. Bu dəfə İtaliyanın "Libertas Nereto" klubu məğlubiyyətə uğradılmışdır. Birinci turda Almaniyanın "Solingen" komandası ilə matçdakı kimi yenə təmsilçilərimiz altı görüşdə yalnız yarım xal itirmişlər - 5,5:0,5.
İtalyanlarla matçda Şəhriyar Məmmədyarov və Andrey Volokitin istirahət etmişlər. Teymur Rəcəbov, Aleksandr Qrişuk, Emil Sutovski, Rauf Məmmədov və Eltac Səfərli dəqiq gedişlərlə rəqiblərini çıxılmaz vəziyyətə salmışlar, Rüstəm Qasımcanov isə heç-heçə oynamışdır.
İki turdan sonra 16 komanda hərəyə 4 xal toplamışdır. Şəxsi görüşlərin nəticələrinə görə, turnir cədvəlinə hələlik itkisiz irəliləyən Rusiyanın "Ekonomist" (Saratov) klubu başçılıq edir - 12 xal. İkinci-üçüncü yerləri ondan yarım xal geri qalan "Baden-Baden" (Almaniya) və "Yuqra" (Rusiya) komandaları bölüşdürürlər. SOCAR 11 xalla dördüncü mövqedədir.
Tərkibində azərbaycanlı qrossmeyster Qədir Hüseynovun da çıxış etdiyi Ukraynanın DZO-PQMB komandasının da uğurlu startını qeyd edək - iki matçda iki qələbə.
Dünən Bakı vaxtı ilə saat 18-də başlanan üçüncü turda SOCAR Bosniya və Herseqovinanın "Bosna" (Sarayevo) klubu ilə görüşmüşdür.

Oqtay BAYRAMOV, "Xalq qəzeti"