Sentyabrın 25-də Bakıda Azərbaycan Boks Federasiyasının inzibati binasının təməlqoyma mərasimi keçirilmişdir.
Tədbirdə Azərbaycan Boks Federasiyasının (ABF) prezidenti Kəmaləddin Heydərov, gənclər və idman naziri Azad Rəhimov və Beynəlxalq Həvəskar Boks Assosiasiyasının (AİBA) prezidenti Çinq-Kuo Vu və digər rəsmi şəxslər iştirak etmişlər.
Bildirilmişdir ki, federasiyanın inzibati binasının inşası üçün 2 hektar torpaq sahəsi ayrılmışdır. Binada 500 nəfərlik idman kompleksi, 200 nəfərlik mehmanxana, üzgüçülük hovuzu və avtodayanacaq fəaliyyət göstərəcəkdir. Bununla yanaşı, burada transformator yarımstansiyası, qazanxana, nasosxana və su anbarı da quraşdırılacaqdır.
ABF-nin prezidenti Kəmaləddin Heydərov və AİBA-nın prezidenti Çinq-Kuo Vu beton qarışığı tökən qurğunu işə salmış və metal gilizi bünövrəyə atmışlar.
Sonda xatirə şəkli çəkdirilmişdir.

AzərTAc