Azərbaycan bədii gimnastlarının lideri Aliyə Qarayeva Fransanın Monpelye şəhərində keçirilən XXX Yay Olimpiya Oyunlarına lisenziya xarakterli dünya çempionatında həlqə və topla final yarışlarında fəxri kürsüyə yüksələ bilmişdir. Bu təmrinlərdə o, müvafiq surətdə yeddinci və altıncı nəticə göstərmişdir.
Hər iki hərəkətdə Yevgeniya Kanayeva (Rusiya) qalib gəlmişdir. Gümüş medalları da Rusiya idmançısı - Darya Kondakova qazanmışdır. Bürünc mükafatlara həlqə ilə təmrinlərin icrasında israilli Neta Rivkin, topla hərəkətlərdə isə belaruslu Lyubov Çerkaşina sahib olmuşlar.
Dünən təmsilçilərimiz-Aliyə Qarayeva, Anna Qurbanova və Zeynəb Cavadlı gürzlərlə təsnifat yarışlarında çıxış etmişlər. Bu gün isə onlar lentlə hərəkətlərdə ustalıqlarını nümayiş etdirəcəklər. Bu təmrinlər üzrə final yarışları da bu günə təyin edilmişdir.

Avropa çempionatından gümüş medalla
Gənc şahmatçımız Abdulla Qədimbəyli Bolqarıstanın Albena şəhərində yenicə başa çatmış 8-18 yaşlı oğlan və qızlar arasında Avropa çempionatının gümüş mükafatçısı olmuşdur.
Həmyerlimiz 10 yaşlı oğlanların turnirində fərqlənmiş, 9 mümkün xaldan 7,5 xal toplamışdır. Abdulla çempionatın qalibi yunanıstanlı Yevgenios İoannidis ilə eyni nəticə göstərmiş və ondan yalnız əlavə göstəricilərə görə geri qalmışdır. Üçüncü yeri 7 xalla israilli Saar Drori tutmuşdur.

SOCAR Azərbaycan səfərə hazırlaşır
Sloveniyanın Roqaska Slatina şəhərində keçiriləcək şahmat üzrə klublararası 27-ci Avropa çempionatı start ərəfəsindədir. Çempionatın saytında verilmiş iştirakçı komandaların siyahısında Azərbaycanın SOCAR klubunun bu yarışda Teymur Rəcəbov, Şəhriyar Məmmədyarov, Rauf Məmmədov, Eltac Səfərli, Aleksandr Qrişuk (Rusiya), Emil Sutovski (İsrail), Andrey Volokitin (Ukrayna) və Rüstəm Qasımcanovdan (Özbəkistan) ibarət heyətlə mübarizə aparacağı bildirilir.
Avropa çempionatı yeddi turdan ibarətdir. Birinci turun matçları sentyabrın 25-də keçiriləcəkdir. Qalib və mükafatçılar oktyabrın 1-də məlum olacaq.

Oqtay BAYRAMOV, "Xalq qəzeti"