Azərbaycan idmançıları gələn il Londonda keçiriləcək XXX Yay Olimpiya Oyunlarına qazandıqları lisenziyaların sayını getdikcə artırırlar.
Ölkəmizə növbəti olimpiya "bileti"nin sevincini akademik qayıqlarda avarçəkmə üzrə dünya çempionatında Natalya Mustafayeva yaşatmışdır. O, olimpiyaçı olmaq hüququnu Sloveniyanın Bled şəhərində keçirilmiş dünya çempionatında 2000 metr məsafəyə yarışda sübuta yetirmişdir. Bununla da təmsilçilərimizin Olimpiada - 2012-yə qazandıqları lisenziyaların sayı doqquza çatmışdır.
Xatırladaq ki, Mustafayevadan əvvəl yüngül atlet Dmitri Marşin, taekvondoçular Fəridə Əzizova və Ramin Əzizov, boksçu Soltan Migitinov, güllə atıcısı İradə Aşumova, kanoelərdə avarçəkənlər Sergey Bezuqlı - Maksim Prokopenko dueti (2000 metr), digər kanoeçi Valentin Demyanenko (200 m), akademik qayıqlarda avarçəkən Aleksandr Aleksandrov da (2000 metr) olimpiya vəsiqələrini özlərinə təmin etmişlər.

Oqtay BAYRAMOV, "Xalq qəzeti"