Xantı-Mansiyskdə (Rusiya) təşkilatçıların 1 milyon 600 min dollar məbləğində mükafat fondu təsis etdikləri şahmat üzrə Dünya kuboku turnirində dünən səkkizdəbir final matçlarının ilk görüşləri oynanılmışdır. Şəhriyar Məmmədyarov 1/16 finalda ukraynalı Yaroslav Jerebuxa uduzduqdan sonra indi bizim bütün ümidlərimiz Teymur Rəcəbovla Vüqar Həşimovadır. Xəbər verdiyimiz kimi, dördüncü mərhələdə Rəcəbov rusiyalı Dmitri Yakovenko ilə görüşür, Həşimovun isə rəqibi Danimarka təmsilçisi Hayne Peter Nilsendir.
Səkkizdəbir finalın digər matçlarında dörddəbir finala vəsiqə uğrunda bu cütlər mübarizə aparırlar: Ruslan Ponomaryov (Ukrayna) - Lazaro Bruson (Kuba), Qata Kamski (ABŞ) - Pyotr Svidler (Rusiya), Vasili İvançuk (Ukrayna) - Bu Syançji (Çin), Aleksandr Qrişuk - Vladimir Potkin (hər ikisi Rusiya), Yaroslav Jerebux (Ukrayna) - David Navara (Çexiya), Yudit Polqar (Macarıstan) - Leniyer Domingens (Kuba).
Bütün əvvəlki mərhələlərdəki kimi, səkkizdəbir finalda da matçlar iki görüşdən ibarətdir. Əgər iki oyundan sonra hesab 1:1 olarsa, qalibi tay-breyk müəyyənləşdirəcəkdir. Görək bu mərhələdən sonra kim sevinəcək, kim məyus olacaq.
Dünənki görüşlərdə Rəcəbov da, Həşimov da ağ fiqurlarla oynamışlar. Rəcəbov Yakovenkoya, Həşimov isə Nilsenə qalib gəlmişlər.