Azərbaycan idmançıları Türkiyənin Trabzon şəhərində keçirilən Gənclərin Olimpiya Festivalında medalların hesabını açmışlar. Bu barədə azerisport-un yaydığı xəbərdə bildirilir ki, ölkəmizə ilk mükafatı cüdoçu Hüseyn Rəhimli qazandırmışdır. Təmsilçimiz finaladək bütün rəqiblərinə qalib gəlmiş və yalnız həlledici görüşdə rusiyalı Urusxan Balayevə uduzaraq 66 kq çəki dərəcəsində gümüş mükafatçı olmuşdur.

Azərbaycan güləşçiləri fəxri kürsüdə
Buxarestdə başa çatmış gənclər arasında yunan-Roma güləşi üzrə dünya birinciliyində Azərbaycan idmançılarına 3 medal - 1 qızıl və 2 bürünc mükafat təqdim olunmuşdur. Yığmamız isə komanda hesabında birinci yeri tutan Gürcüstandan sonra ikinci olmuşdur.
Rumıniya paytaxtında təmsilçilərimiz arasında ən böyük müvəffəqiyyəti Vilayət Qəhrəmanlı (50 kq) qazanmışdır. O, bütün rəqiblərini, o cümlədən erməni Rudik Mkrtıçyanı məğlubiyyətə uğradaraq, fəxri kürsünün ən yüksək pilləsində təbrikləri qəbul etmişdir.
Vilayətin komanda yoldaşları Eldəniz Əzizli və Rəsul Cunayev müvafiq surətdə 55 və 66 kq çəki dərəcələrində çıxışlarını bürünc medalla başa vurmuşlar.

Çempionat starta hazırlaşır
Ölkəmizin növbəti milli futbol çempionatı start ərəfəsindədir. Artıq bir həftədən sonra ilk oyunlar keçiriləcək, turnir cədvəlinə ilk nəticələr qeyd olunacaqdır.
Çempionat avqustun 6-da "Xəzər-Lənkəran" - "Sumqayıt şəhər", "İnter" - "Turan" və "Kəpəz" - "Rəvan" görüşləri ilə başlanacaq. Ertəsi gün "Qəbələ" futbolçuları "Bakı"nı, "Simurq" AZAL-ı qəbul edəcəklər, "Neftçi" isə "Qarabağ"la qarşılaşacaq.

Oqtay BAYRAMOV, "Xalq qəzeti"