Çin Xalq Respublikasının Ninbo şəhərində keçirilən şahmat üzrə dünya çempionatı başa çatmaq üzrədir. Bu gün sonuncu, doqquzuncu turla çempionata yekun vurulacaqdır.
Ötən şənbə və bazar günlərinə təsadüf etmiş altıncı və yeddinci turlarda İsrail komandası ilə heç-heçə oynayıb (2:2), ABŞ təmsilçilərinə uduzan (1,5:2,5) Azərbaycan şahmatçıları bu iki matçda yalnız 1 xal ilə kifayətlənməli olmuşlar. Komandamız son iki tur ərəfəsində 6 xalla turnir cədvəlində yeddinci pillədə idi və iki-üçüncü mövqelərdə olan Çin ilə Ukraynadan 3, dörd-altıncı yerləri bölüşdürən Rusiya, Macarıstan və ABŞ komandalarından isə 2 xal geri qalırdı.
Dünən keçirilən səkkizinci turda yığmamız Ermənistan komandası ilə görüşmüşdür. Bu matçda Teymur Rəcəbov və Rauf Məmmədov birinci və üçüncü taxtalarda qaralarla müvafiq surətdə Levon Aronyan və Vladimir Akopyana, Vüqar Həşimov və Şəhriyar Məmmədyarov isə ikinci və dördüncü taxtalarda ağ fiqurlarla Sergey Movsesyan və Qabriel Sarqssyana qarşı oynamışlar. Matç heç-heçə başa çatmışdır - 2:2. Rəcəbov və Həşimov hərəyə yarım xal qazanmışlar, Məmmədyarov qalib gəlmiş, Məmmədov isə uduzmuşdur.
Çempionatda Azərbaycan komandasının sonuncu rəqibi Misir yığması olacaq. Son turun görüşləri bu gün Bakı vaxtı ilə səhər saat 7-də başlanacaq.

Şimali irlandiyalı və isveçrəli hakimlər
Ağdamın "Qarabağ" komandası qitə miqyaslı yarışlarda daha bir məsul oyun ərəfəsindədir. UEFA Avropa Liqası turnirinin ilk iki təsnifat mərhələsində Litvanın "Banqa" və Farer adalarının "Streymur" klubları ilə görüşlərdən qalib ayrılan Azərbaycan futbolçuları üçüncü mərhələdə Belçikanın Brügge şəhərinin eyniadlı məşhur komandası ilə "münasibətləri aydınlaşdırmağa" hazırlaşırlar.
UEFA iyulun 28-də bu rəqiblər arasında Belçikada keçiriləcək ilk görüşdə hakimliyi Arnold Xanterə (Şimali İrlandiya) həvalə etmişdir. Avqustun 4-də Tofiq Bəhramov adına Respublika stadionunda oynanılacaq cavab matçında isə hakim funksiyasını isveçrəli Saşa Kever yerinə yetirəcəkdir.

Oqtay BAYRAMOV, "Xalq qəzeti"