"Qarabağ" UEFA Avropa Liqası turnirinin ikinci təsnifat mərhələsinin cavab görüşündə Tofiq Bəhramov adına Respublika stadionunda Farer adalarının "Streymur" komandasının qapısına bir dəfə belə yol tapa bilməsə də, hər halda, görüşü qolsuz heç-heçə ilə başa çatdırıb, "Banqa"dan (Litva) sonra bu rəqibi də keçməyi bacardı. Ağdam klubunun bir həftə əvvəl səfərdə 1:1 hesabı ilə nəticələnən oyunda vurduğu top bu cütün qalibinin müəyyənləşməsində həlledici rol oynadı.
İndi qarşıda Azərbaycan futbolçularını daha güclü rəqib - Belçikanın Brügge şəhərinin eyniadlı klubu ilə üçüncü mərhələ çərçivəsində iki çətin görüş gözləyir. Lakin "Brügge" nə qədər zəhmli olsa da, "Qarabağ" da özünü Avropada tanıtmağı bacarmışdır. Xüsusən də ötən illərdə "Rusenborq" (Norveç) və "Visla" (Polşa) kimi komandalarla görüşlərdən sonra. Bu səbəbdən də Qurban Qurbanovun yetirmələrindən "Brügge" ilə görüşlərdə də inamlı və məhsuldar oyun gözləmək olar.
Belçika klubu ilə ilk oyun iyulun 28-də Brüggedə keçiriləcək və Bakı vaxtı ilə saat 23.30-da başlanacaq. Paytaxtımızda cavab matçı isə bundan bir həftə sonra oynanılacaq.
Avroliqada mübarizəyə ikinci təsnifat mərhələsindən başlayan "Xəzər-Lənkəran" da doğma şəhərdə İsrailin "Makkabi" komandası ilə oyundan heç-heçə ilə ayrıldı - 0:0. Bu, Təl-Əvivdə ilk görüşdə 1:3 hesabı ilə uduzan komandamız üçün məğlubiyyətə bərabər heç-heçədir. Lənkəran futbolçuları da AZAL və "Neftçi" kimi qitə miqyaslı yarışlarda çıxışlarını erkən başa vurdular. İndi bütün ümidlər "Qarabağ"a qalır.{nl}

Oqtay BAYRAMOV, "Xalq qəzeti"