Ninbo şəhərində (Çin Xalq Respublikası) birinci yarısı artıq arxada qalan kişilərdən ibarət komandalar arasında şahmat üzrə dünya çempionatında dünən istirahət günü idi. Bu gün isə altıncı turla yarış iştirakçıları medallar uğrunda mübarizənin həlledici mərhələsinə qədəm qoyacaqlar.
Bu tur ərəfəsində turnir cədvəlinin birinci pilləsində olan Ermənistan komandasının 8 xalı vardır. İkinci-üçüncü yerləri bölüşdürən Rusiya və Macarıstan şahmatçıları ondan bir xal geri qalırlar. Ukrayna komandası 6, Çin, Azərbaycan və ABŞ yığmaları 5, israilli qrossmeysterlər 4, Hindistan komandası 3 xal toplamışlar, misirlilər isə hələ xal qazana bilməmişlər.
Altıncı turda Azərbaycan şahmatçıları İsrail komandası ilə qarşılaşacaqlar. Bu gün həmçinin Rusiya-Ukrayna, Ermənistan-Hindistan, ABŞ-Macarıstan və Misir-Çin matçları keçiriləcəkdir.
Təmsilçilərimizin finişdə qalan üç rəqibi isə ABŞ, Ermənistan və Misir komandaları olacaq.{nl}

Oqtay BAYRAMOV, "Xalq qəzeti"