Avropa çempionu Azərbaycan komandası Ninboda (Çin Xalq Respublikası) keçirilən şahmat üzrə dünya çempionatının ikinci turunda Asiya çempionu Hindistan yığmasına qalib gəlməklə (3:1) həm turnir cədvəlində öz vəziyyətini xeyli yaxşılaşdırmış, həm də ötən ilin yanvarında Türkiyənin Bursa şəhərində təşkil olunan çempionatda dünya çempionu Vişvanatan Anandın həmvətənləri ilə matçda qeydə alınmış məğlubiyyətin əvəzini inamla çıxmışdır.
Bu turun Rusiya-Macarıstan (3:1), Ukrayna-Çin (1,5:2,5), İsrail - Misir (3:1), ABŞ - Ermənistan (2:2) görüşlərinin də nəticələri cədvəldə öz əksini tapdıqdan sonra Rusiya komandası 4 xalla vahid lider oldu. İkinci-dördüncü yerləri bölüşdürən Azərbaycan, Ermənistan və Çin kollektivləri ondan 1 xal geri qalırdılar.
Dünən keçirilən üçüncü turda qrossmeysterlərimizi macarlarla matç gözləyirdi. Bu görüş ərəfəsində məlum oldu ki, Azərbaycan komandasının kapitanı Vladimir Tukmakov heyətdə yenə dəyişiklik edərək Qədir Hüseynova istirahət verməyi qərara almış və Rauf Məmmədovu üçüncü taxtaya qaytarmışdır. Matçda Teymur Rəcəbov və Məmmədov qaralarla müvafiq surətdə Peter Leko və Yudit Polqara qarşı oynamalı idilər, Vüqar Həşimov və Şəhriyar Məmmədyarov isə ikinci və dördüncü lövhələrdə ağ fiqurlarla Zoltan Almaşi və Çaba Baloqu sınağa çəkməyə hazırlaşırdılar. Görüş 2,5:1,5 hesabı ilə Macarıstan komandasının xeyrinə başa çatmışdır.
Bu gün Azərbaycan şahmatçıları Rusiya komandası ilə görüşəcəklər.{nl}

Oqtay BAYRAMOV, "Xalq qəzeti"