Azərbaycan milli komandası Çin Xalq Respublikasının Ninbo şəhərində keçirilən şahmat üzrə dünya çempionatına heç-heçə ilə başlamışdır. On ölkə təmsilçilərinin mübarizə apardığı bu yarışda qrossmeysterlərimizin ilk rəqibi meydan sahibləri Çin şahmatçıları olmuşlar. Matçda 2:2 hesabı qeydə alınmışdır.
Teymur Rəcəbov və Rauf Məmmədov birinci və üçüncü taxtalarda qaralarla oynayaraq müvafiq surətdə Van Hao və Li Çao ilə xalı yarı bölmüşlər. Digər iki görüşdə Vüqar Həşimov (ikinci lövhə) ağ fiqurlarla Van Yueyə uduzmuş, Şəhriyar Məmmədyarov (dördüncü taxta) isə Yu Yanyini məğlubiyyətə uğratmışdır.
Birinci turun Hindistan-Macarıstan matçında da komandalardan heç biri öz üstünlüyünü sübuta yetirə bilməmişdir - 2:2. Üç matç isə tərəflərdən birinin qələbəsi ilə başa çatmışdır: Rusiya-ABŞ - 3:1, Ermənistan-İsrail - 3,5:0,5, Ukrayna-Macarıstan - 2,5:1,5.
Dünən keçirilən ikinci turda Azərbaycan yığması Hindistan komandası (Pentala Harikrişna, Krişnan Saşikiran, Şekar Surya Qanquli, Parimarjan Negi) ilə görüşmüşdür. Bu matçda komandamızın heyətində dəyişiklik olmuş, Məmmədovu Qədir Hüseynov əvəz etmişdir. Rəcəbov və Məmmədyarov müvafiq surətdə birinci və üçüncü taxtalarda ağlarla, Həşimov və Hüseynov isə ikinci və dördüncü taxtalarda qara fiqurlarla oynamışlar.
Azərbaycan komandası 3:1 hesabı ilə qələbə qazanmışdır. Rəcəbov və Məmmədyarov rəqiblərinə qalib gəlmişlər, Həşimov və Hüseynov isə öz görüşlərini heç-heçə başa çatdırmışlar.
Xatırladaq ki, dairəvi sistem üzrə keçirilən dünya çempionatı doqquz turdan ibarətdir və iyulun 26-da finişə çatacaq. Turlar Bakı vaxtı ilə gündüz saat 12-də başlanır. Sonuncu, doqquzuncu tura isə yenə də bizim vaxtla səhər saat 7-də start veriləcək.
Bu gün keçiriləcək üçüncü turda qrossmeysterlərimizin rəqibi Macarıstan komandası olacaq.

Oqtay BAYRAMOV, "Xalq qəzeti"