Azərbaycanın sonuncu milli futbol çempionatının və kubok yarışlarının ən yaxşı üç komandası "Neftçi", "Xəzər-Lənkəran" və "Qarabağ" bu üç şəhərdə çox çətin sınaq ərəfəsindədirlər. Bakılılar və lənkəranlılar müvafiq surətdə Çempionlar Liqası və Avropa Liqası turnirlərinin ikinci təsnifat mərhələsində ilk addımlarını atmağa hazırlaşırlar, Avroliqanın birinci mərhələsində "Banqa"nın (Litva) öhdəsindən asanlıqla gələn Ağdam klubu isə növbəti səddi də dəf etmək əzmindədir.
Birinci olaraq bu axşam "Neftçi" meydana çıxacaq. Çempionumuzun Xorvatiya paytaxtının 40 min nəfərə qədər tamaşaçı tutan "Maksimir" stadionunda yerli "Dinamo" ilə görüşündə topa ilk zərbə Bakı vaxtı ilə saat 23-də endiriləcək və oyunu fransalı hakim Entoni Qotye idarə edəcəkdir. Zaqrebdən alınan xəbərlərə görə, matça maraq çox böyükdür, bütün biletlər qısa bir vaxt ərzində satılmışdır. Belə bir şəraitdə oynamaq nə qədər çətin olsa da, Azərbaycan futbolçuları mübariz əhval-ruhiyyədədirlər və evə sərfəli nəticə ilə qayıtmaq üçün bütün qüvvələrini ağır mübarizəyə sərf etməyə hazırdırlar.
"Xəzər-Lənkəran" isə Avroliqanın ikinci təsnifat mərhələsinə sabah Təl-Əvivdə başlayacaq. Püşk Azərbaycan kubokunun sahibinə də kifayət qədər güclü rəqib seçmişdir. İsrailin "Makkabi" klubunun adı qitənin futbol dairələrində hörmətlə çəkilir. Ancaq özü haqqında yaxşı rəy yaradan Lənkəran komandası da təcrübəli rəqibinin ad-sanı qarşısında geri çəkilmək fikrində deyil.
"Makkabi" - "Xəzər-Lənkəran" görüşünə saat 22.30-da start veriləcək. Bu oyunda kimin sevinib, kimin məyus olacağını yunanıstanlı hakim İlias Spatasın final işarəsindən sonra biləcəyik.
Farer adalarının paytaxtı Torshavnda isə "Streymur" - "Qarabağ" qarşılaşması saat 23-də başlanacaq. UEFA sabah keçiriləcək bu oyunda ədaləti qorumağı Mark Uitbinin başçılıq etdiyi uelsli hakimlər briqadasına həvalə etmişdir. Avropa Liqasının ikinci təsnifat mərhələsinin qapısını iki gözəl qələbə ilə açan Ağdam futbolçuları uzaq Farer adalarına ilk müvəffəqiyyəti daha da inkişaf etdirib, bir həftə sonra Bakıda oynanılacaq cavab görüşü ərəfəsində ümumi qələbə üçün özlərinə yaxşı zəmin yaratmaq əzmi ilə yola düşmüşlər. Hər üç klubumuza layiqli oyun və uğurlu nəticələr arzulayaq.

Məmmədyarovaların xeyrinə
İspaniyanın Benaske şəhərində keçirilən "Vilya-de-Benaske" 31-ci beynəlxalq şahmat festivalının "A" turnirinin beşinci turunda Azərbaycan təmsilçiləri Zeynəb və Türkan Məmmədyarovalar ispaniyalı rəqiblərlə qarşılaşmış və qələbə qazanmışlar.
Zeynəb qara fiqurlarla Xavyer Sançesi, Türkan isə ağlarla Sequra Juberiası məğlubiyyətə uğratmışlar. Beş turdan sonra bacıların hərəyə 4 xalı var və onlar turnir cədvəlinə başçılıq edən Elizbar Ubilavadan (İspaniya) bir xal geri qalırlar.

Oqtay BAYRAMOV, "Xalq qəzeti"

Yarım xal çatışmadı
Bolqarıstanın Varna şəhərində keçirilmiş açıq beynəlxalq turnirin iki qalibindən biri olmaq üçün Azərbaycan şahmatçısı Bəhruz Rzayevin yarım xalı çatmamışdır. Daha altı iştirakçı kimi doqquz mümkün xaldan 6,5 xal toplayan həmyerlimiz əlavə göstəricilərə görə beşinci yeri tutmuşdur.
Yarışın baş mükafatını isə 7 xalla Bolqarıstan şahmatçısı Boris Çatalbaşov qazanmışdır.
Turnirdə iştirak etmiş digər təmsilçilərimizdən Təbriz İdrisov və Abdulla Qədimbəylinin 6 xalla finişə müvafiq surətdə 9-cu və 12-ci yerlərdə çatdıqlarını da qeyd edək.