Azərbaycanın sərbəst üsulla güləşənləri Heydər Əliyev adına İdman-Konsert Kompleksində keçirilən və ümummilli liderin xatirəsinə həsr edilən "Qızıl Qran-Pri" beynəlxalq turnirində yüksək hazırlıq səviyyəsi nümayiş etdirərək 5 qızıl medal qazanmış, komanda hesabında 1-ci olmuş və idman sarayını tamaşaçıların alqışları altında tərk etmişlər.
Xalça ustalarımızdan beşi Mahmud Maqomedov (55 kq), Zəlimxan Hüseynov (60 kq), Cəbrayıl Həsənov (66 kq), Şərif Şərifov (84 kq) və Xetaq Qazyumov (96 kq) bütün görüşlərdə rəqiblərini məğlubiyyətlə barışmağa məcbur edərək fəxri kürsünün zirvəsinə yüksəlmişlər. Daha iki idmançımız Ağahüseyn Mustafayev (60 kq) və Əşrəf Əliyev (74 kq) isə yalnız finalda uduzub gümüş mükafatçılar olmuşlar.
Sərbəst üsulla güləşənlərin mötəbər turnirdə belə uğurlu çıxışları ümid etməyə əsas verir ki, onlar sentyabrda İstanbulda keçiriləcək London Olimpiadası 2012-yə lisenziya xarakterli dünya çempionatında da baş rollardan birini oynayacaq və Türkiyədən Azərbaycana mümkün qədər çox olimpiya "bileti" ilə qayıdacaqlar.
Xatirə turniri dünən qadın güləşçilərin görüşləri ilə davam etdirilmişdir. Bu gün isə medallara hücum etmək növbəsi yunan-Roma güləşi ustalarınındır.

Makedoniyalı Qoran Spitkoski
Biz UEFA Avropa Liqası yarışlarının ikinci təsnifat mərhələsinin birinci raundu çərçivəsində Ağdamın "Qarabağ" klubunun Farer adalarının paytaxtı Torshavn şəhərində yerli "Streymur" komandası ilə görüşünü uelsli hakimlər briqadasının idarə edəcəyini diqqətinizə çatdırmışdıq. Bu rəqiblər arasında cavab matçının da hakimi artıq məlumdur.
UEFA iyulun 21-də Tofiq Bəhramov adına Respublika stadionunda oynanılacaq görüşün hakimliyini Makedoniya Futbol Federasiyasının nümayəndəsi Qoran Spitkoskiyə həvalə etmişdir.

Bacıların ikinci qələbəsi
Zeynəb və Türkan Məmmədyarovalar İspaniyanın Benaske şəhərində keçirilən "Vilya-de-Benaske" 31-ci beynəlxalq şahmat festivalı proqramında ən mötəbər yarış olan "A" turnirində ikinci görüşlərini də qələbə ilə başa vurmuşlar.
Bacılar startda olduğu kimi, bu dəfə də ispaniyalı rəqiblərə qalib gəlmişlər. İki turdan sonra Məmmədyarovaların hərəyə 2 xalı vardır. Onlarla yanaşı, daha bir qrup iştirakçı turnirdə itkisiz irəliləyir. Dünən keçirilən üçüncü turda Zeynəbi macarıstanla Kristian Çzabo, Türkanı isə İspaniya təmsilçisi Elizbar Ubilava ilə görüşlər gözləyirdi.

Oqtay BAYRAMOV, "Xalq qəzeti"