İspaniyanın Benaske şəhərində yenicə starta çıxmış "Vilya-de-Benaske" 31-ci şahmat festivalının "A" turnirində mükafatlar uğrunda 475 rəqib, o cümlədən 37 qrossmeyster mübarizə aparır. On turdan ibarət bu yarışda ölkəmizi Zeynəb və Türkan Məmmədyarovalar təmsil edirlər.
Bacılar turnirə qələbə ilə başlamışlar. Birinci turda Zeynəb qaralarla, Türkan isə ağlarla ispaniyalı rəqiblərinə qalib gəlmişlər. Dünən ikinci turun görüşləri keçirilmişdir.

Altı görüşdə hərəyə 4 xal
Xəbər verdiyimiz kimi, Bolqarıstanın Varna şəhərində davam edən beynəlxalq turnirin iştirakçıları arasında Azərbaycan şahmat məktəbinin bir qrup yetirməsi də vardır. Altı turdan sonra dörd təmsilçimiz İdris Təbrizov, Bəhruz Rzayev, Xəyalə İsgəndərova və Elxan Bayramov hərəyə 4 xal toplamışlar.
Turnir cədvəlinə isə Bolqarıstan şahmatçıları Boris Çatalbaşov və Qriqor Qriqorov başçılıq edirlər. Liderlərin 5 xalı vardır.

Oqtay BAYRAMOV,"Xalq qəzeti"