Avstriyanın paytaxtı Vyanada yeni mövsüm üçün qadın voleybol klubları arasında Çempionlar Liqası turnirinin ilkin mərhələsinin püşkü atılmış və bu mötəbər yarışda ilk dəfə iki komanda ilə mübarizə aparacaq Azərbaycan voleybolçularının rəqibləri məlum olmuşdur.
Liqada sonuncu turnirin finalçısı "Rabitə" Türkiyənin məşhur "Fənərbaxça", Fransanın "Mulxauz" və Almaniyanın "Drezdner" klubları ilə birlikdə "B" qrupunda çıxış edəcək. Digər komandamız, 2010-2011-ci illər mövsümündə "Çellenc kuboku" yarışının qalibi olmuş "Azərreyl" isə "D" qrupunda "Berqanto" (İtaliya), "Vakifbank" (Türkiyə) və "Konstanta" (Rumıniya) voleybolçuları ilə yarışacaq.
Turnirin medalları uğrunda 20 klub mübarizə aparacaq. Onlar hərəsində dörd komanda olmaqla beş qrupa bölünmüşlər. Yarışa noyabr ayında start veriləcəkdir.
Qrup mərhələsi və pley-off görüşləri sınağından uğurla çıxacaq ən yaxşı dörd komanda həlledici mərhələyə vəsiqə qazanacaq. "Dördlər finalı" Bakıda təşkil olunacaq.

Oqtay BAYRAMOV, "Xalq qəzeti"